विधिको शासन नै लोकतन्त्रको आत्मा हो: कानूनमन्त्री चौरसिया
हाम्रा कुरा
प्रकाशित २०८२ भदौ १ आइतबार
675
Shares
काठमाडौँ। कानून, न्याय तथा संसदीय मामिलामन्त्री अजयकुमार चौरसियाले विधिको शासन नै लोकतान्त्रिक व्यवस्थाको आत्मा भएको बताएका छन्। मुलुकी संहिता दिवसको अवसरमा आयोजित कार्यक्रममा बोल्दै उनले समाजमा शान्ति, सुव्यवस्था र न्यायका लागि कानून नै मूल आधार रहेको बताए।
मन्त्री चौरसियाले मुलुकी संहिताहरू विधिको शासन कायम गर्नका लागि कोशेढुङ्गा भएको उल्लेख गरे। उनले संविधान र कानूनमा परिमार्जनको आवश्यकता रहेको भन्दै अग्रिम जमानत, फौजदारी कार्यविधि संहिता र देवानी संहिताका केही विषयहरू संशोधनका लागि मन्त्रिपरिषद्मा प्रस्ताव पठाइसकेको जानकारी दिए।
उनले कानून एक गतिशील सामाजिक प्रक्रिया भएकाले समाजको आवश्यकताअनुसार यसलाई परिमार्जन र सुधार गर्नुपर्नेमा जोड दिए। साथै, उनले कानून मन्त्रालय र कानून आयोगमा अन्य केही विषयमा पनि काम भइरहेको र ती विषयहरू पनि समेटेर संशोधनको प्रस्ताव अगाडि बढाइने बताए।
