कैलाश यात्रा मार्गमा फसेका चार सय बढी तीर्थयात्रीको उद्धार
हाम्रा कुरा
प्रकाशित २०८२ साउन २२ बिहिबार
1.3k
Shares
काठमाडौँ। भारत–तिब्बत सीमा प्रहरी (आइटीबीपी) ले हिमाचल प्रदेशको किन्नेर जिल्लास्थित किन्नेर कैलाश यात्रा मार्गमा फसेका ४१३ तीर्थयात्रीलाई उद्धार गरेको छ।
आइटीबीपीको १७औँ बटालियनका कर्मचारीहरूले तीर्थयात्रीहरूलाई सुरक्षित रूपमा बाहिर निकाल्न 'ट्राभर्स क्रसिङ' प्रविधि र डोरीको सहयोगमा उद्धार अभियान सञ्चालन गरेका थिए।
किन्नेर जिल्ला प्रशासनबाट प्रभावित क्षेत्रमा थप मानिसहरू फसेको सूचना पाएपछि आइटीबीपी र एनडीआरएफका टोलीहरू पुनः परिचालन गरिएको छ। उनीहरूले अहिले सघन खोजी र उद्धार कार्य जारी राखेका छन्। आइटीबीपीले बाँकी सबै तीर्थयात्रीको सुरक्षा सुनिश्चित गर्नका लागि जिल्ला प्रशासन र अन्य सम्बन्धित निकायसँग समन्वय गरिरहेको जनाएको छ।
भारतीय मौसम विज्ञान विभाग (आइएमडी) ले हिमाचल प्रदेशका बिलासपुर, सोलन, सिमला, सिरमौर, र मन्डी जिल्लाहरूमा तीव्र वर्षाको चेतावनी जारी गरेको छ। यसका साथै, अन्य धेरै जिल्लाहरूमा पनि हल्कादेखि मध्यम वर्षाको अनुमान गरिएको छ।
लगातारको भारी वर्षाका कारण सिमलामा सामान्य जनजीवन प्रभावित भएको छ र अधिकांश शैक्षिक संस्थाहरू बन्द गरिएका छन्।
राज्य विपद् व्यवस्थापन प्राधिकरण (एसडीएमए) को रिपोर्टअनुसार, यस वर्षको मनसुनमा (२० जुनदेखि ५ अगस्टसम्म) हिमाचल प्रदेशमा १९४ जनाको मृत्यु भएको छ। साथै, धेरै मानिस घाइते भएका छन् र ठूलो मात्रामा भौतिक संरचनामा पनि क्षति पुगेको छ।
