काठमाडौं । रोयल च्यालेन्जर्स बेंगलुरु (आरसीबी) ले १८ सिजनको लामो प्रतीक्षापछि आफ्नो पहिलो इन्डियन प्रिमियर लिग (आईपीएल) उपाधि जित्दा टोलीका स्टार ब्याट्सम्यान विराट कोहली निकै भावुक बने। अहमदाबादस्थित नरेन्द्र मोदी स्टेडियममा मंगलबार राति पञ्जाब किंग्सलाई ६ रनले पराजित गरेपछि कोहली आफ्ना आँसु रोक्न सकेनन् र मैदानमै रोएका थिए।
विगत १८ वर्षदेखि आरसीबीसँग आबद्ध रहेका र टोलीका एक मात्र स्थायी सदस्यका रूपमा रहेका कोहलीका लागि यो क्षण निकै विशेष थियो। आफ्नो युवा अवस्था, उत्कृष्ट प्रदर्शन र सम्पूर्ण अनुभव यस फ्रेन्चाइजलाई समर्पण गरेका कोहलीले उपाधि जित्नका लागि हरेक सिजन प्रयास गरेका थिए। आखिरमा यो सपना पूरा हुँदा उनी अत्यधिक भावुक बनेको देखिएको हो।
खेल सकिएपछि कोहलीले आफ्नो भावना व्यक्त गर्दै भने, "१८ वर्ष भयो। मैले यस टोलीलाई आफ्नो युवा अवस्था, आफ्नो प्राइम र आफ्नो अनुभव दिएको छु। मैले हरेक सिजनमा जित्ने प्रयास गरेको छु र मैले आफ्नो सबै थोक दिएको छु र अन्ततः यो क्षण आएको छ, यो एक अविश्वसनीय अनुभूति हो।" उनका यी शब्दहरूले उपाधि जित्ने सपना कति गहिरो थियो भन्ने कुरा स्पष्ट पार्छ।
विराटको यो भावुक क्षण क्यामेरामा कैद भएको थियो र उनकी पत्नी अनुष्का शर्मा पनि खुसीले भावुक भएको देखियो। यो जित केवल आरसीबीको मात्र नभई विराट कोहलीको व्यक्तिगत १७ वर्ष लामो उपाधि खडेरीको अन्त्य पनि थियो, जसले उनको आँखामा खुसीका आँसु ल्यायो।
बेंगलुरु २००८ देखि आईपीएल खेलिरहेका टोलीहरूको हिस्सा हो। २०२४ सम्म टोलीसँग कुनै पनि उपाधि थिएन, तर टोली तीन पटक फाइनलमा भने पुगेको थियो। २००९, २०११, र २०१६ मा बेंगलुरुले ३ फाइनल खेल्यो, तर तीनै गुमायो।
२०२५ अघि बेंगलुरुका लागि रोचक कुरा तीनै फाइनल टोलीले चेज गर्दा गुमाएको थियो। २००९ मा डेक्कन चार्जर्सविरुद्ध बेंगलुरुले टस जित्यो, तर छ रनले खेल गुमायो। २०११ र २०१६ मा टोलीले टस हारेर पहिले बलिङ गर्नुपर्यो, तर चेन्नाई र हैदराबादसँग हार मिल्यो।
