काठमाडौँ । भारतमा जारी इन्डियन प्रिमियर लिग (आईपीएल) टी–२० क्रिकेटको अठारौँ संस्करण आज सकिँदैछ । आज आईपीएलले नयाँ च्याम्पियन पाउँदैछ ।
पहिलो पटक उपाधिविहीन दुई टोलीहरु रोयल च्यालेन्जर्स बैंगलुरु र पञ्जाब किंग्स फाइनलमा पुगेसँगै आईपीएलले नयाँ विजेता पाउन लागेको हो ।
पञ्जाब किंग्स ११ वर्षपछि र बैंगलुरु ९ वर्षपछि फाइनलमा पुगेको हो ।
खेल अहमदाबादमा बेलुकी ७ः४५ बजेदेखि शुरु हुनेछ । आईपीएलका १७ औं संस्करणसम्म मुम्बई इन्डियन्स र चेन्नई सुपर किंग्सले समान ५, कोलकाता नाइट राइडर्सले ३ तथा राजस्थान रोयल्स, डेक्कन चार्जर्स, सनराइजर्स हैदराबाद र गुजरात टाइटान्सले समान १–१ उपाधि जितेका छन् ।
अहिलेसम्म सात टिमले उपाधि जितेकामा आजदेखि आठौँ टिम बैंगलुरु वा पञ्जाब हुनेछ ।
समापन
समापनको कार्यक्रम भने खेल शुरु हुनुअघि हुनेछ । उक्त विशेष कार्यक्रम हालै भारतले पाकिस्तानमा रहेका आतंकवादीविरुद्ध चलाएको ‘अपरेशन सिन्दूर’ लाई थिम (विषयवस्तु) बनाएर तयार भएको जनाइएको छ ।
कार्यक्रम तीन सेनाका प्रमुखहरुलाई बोलाइएको छ । यद्यपि उनीहरु आउने वा नआउनेबारे कुनै टुंगो लागेको छैन ।
उक्त नरेन्द्र मोदी रंगशालामा १ लाख ३२ हजार दर्शक अट्ने क्षमता छ । यो सबैभन्दा ठूलो रंगशाला हो ।
२५ हजार सिट सुरक्षाकर्मी र व्यवस्थापनका लागि राखिएको छ भने बाँकी सिटका टिकट बिक्री भइसकेको छ ।
पूरै रंगशाला भारतीय झण्डाको लाइटले सजाइएको छ । सो क्रममा शंकर महादेवनको लाइभ कन्सर्ट हुनेछ ।
महादेवनले अपरेशन सिन्दूरका क्रममा ज्यान गुमाएका सेना तथा पहलगाम आक्रमणमा मारिएका एक नेपालीसहित २६ हिन्दूधर्मीको नाममा गीत गाएर श्रद्धाञ्जली अर्पण गर्नेछन् ।
उनले आफ्ना छोराहरु सिद्धार्थ र शिवमसँगै प्रस्तुति दिनेछन् ।
