सत्र दिनदेखिको शिक्षकको सडक आन्दोलन जारी, सरकार के चाहन्छ ? [फोटोफिचर]
सरकारले अहिले जात्रा देखाउँदा भोलि आफैँलाई जात्रा पर्ला भन्ने पनि सोच्ने हो कि !
हाम्रा कुरा
प्रकाशित २०८२ वैशाख ५ शुक्रबार
883
Shares
काठमाडौँ । विभिन्न माग राखी १७ दिनदेखि आन्दोलनरत शिक्षकहरुले माइतीघर नयाँ बानेश्वर सडक अवरोध गर्दा सर्वसाधारणले सास्ती भोग्नु परेको छ ।
मुख्य सडक नै अवरोध हुँदा १७ दिनदेखि सो क्षेत्रको ट्राफिक प्रभावित भएको अत्यावश्यकीय सवारी अन्तै मोड्नु पर्ने अवस्था छ । त्यतिमात्र हैन उक्त मुख्य सडकको दुरुपयोग भएपछि सहायक मार्गमा हुने जामले सवारी लामो समयसम्म फस्दै आएका छन् ।
गत चैत २० गतेदेखि नियमित रुपले शिक्षकहरु आन्दोलित छन् । सिंहदरबार जोडिएको छ । तर सरकारले सुनिरहेको छैन ।
उता बैशाख २ गतेदेखि नयाँ शैक्षिक सत्रको भर्ना खुलिसकेको छ । विद्यालयहरु ठप्प भएसँगै भर्ना प्रक्रिया रोकिएको छ ।
सामुदायिक विद्यालयका विद्यार्थीहरु बाध्य भएर निजी विद्यालयमा जान थालेका छन् । तर नौ र १० कक्षमा पढ्ने विद्यार्थीहरु अब कता जाने ? गाउँका विद्यालयमा कहाँ खोज्ने निजी ?
शिक्षकहरुले माग पूरा नहुन्जेल आन्दोलन नछाड्ने बताएका छन् ।
सरकार के चाहन्छ ?
अहिले सामुदायिक विद्यालयहरु केबल गरिबका सन्तानले पढ्ने विद्यालय जस्ता भएका छन् । केहीलाई छाड्ने हो भने अधिकांश विद्यालय शिक्षकलाई तलब खुवाउनका लागि जस्ता पनि देखिएका छन् ।
अहिले तिनै शिक्षकलाईसमेत पनि सरकारले समय सुहाउँदो सेवा सुविधा नदिएको गुनासो छ ।
प्रधानमन्त्री केपी शर्मा ओली आफ्नो माग मात्र राखेर जिद्दी गर्न नहुने भनेर शिक्षकहरुलाई भड्काइरहेका छन् । शिक्षा मन्त्री विद्या भट्टराई प्रतिक्रियाविहीन छिन् ।
सत्ता साझेदार नेपाली कांग्रेसले विद्यार्थीका पक्षमा आफूहरु रहेको बताएको छ । तर अहिलेसम्म पहल गरेको देखिएन ।
विपक्षी दल माओवादी केन्द्रले पनि सरकार ढाल्ने गरी नै शिक्षकलाई उचालिरहेका छन् तर पहल अगाडि बढाएका छैनन् ।
आखिर के चाहन्छ सरकार ? के विद्यार्थीले पढ्न पाउने अधिकार वञ्चित गर्ने लक्ष्य नै हो सरकारको ?
कि शिक्षकका माग जायज छैनन् भने कारबाही गर्नुपर्यो । जायज माग छन् भने सम्बोधन गर्नुपर्यो । जात्रा गर्दा सरकारलाई नै पछि जात्रा नपर्ला भन्न सकिन्न ।
लोकतन्त्र बेथितिपूर्ण भयो भनेर एउटा पक्ष आन्दोलित छ । उसले लोकतन्त्रमा अलोकतान्त्रिक क्रियाकलाप बढी भयो भन्दै राजा खोजिरहेको छ ।
के सरकारले सोचिरहेको छैन कि हरेक घरमा विद्यार्थी छन् र यतिबेला सबै पीडित छन् ? बेलैमा सोच्ने कि समय घर्केपछि ?
