काठमाडौँ । पोखरा थन्डर्स एनसेल नेपाल सुपर लिग (एनएसएल) फुटबल प्रतियोगिताको प्लेअफमा प्रवेश गरेको छ । लिग चरणको अन्तिम खेलमा बुटवल लुम्बिनी एफसीमाथि शानदार जित निकाल्दै पोखरा प्लेअफमा पुगेको हो ।
त्रिपुरेश्वरस्थित दशरथ रंगशालामा मंगलबार बेलुकी सम्पन्न खेलमा पोखराले बुटवललाई २–० ले पराजित गरेको हो । पोखरालाई जिताउन आयुष घलान र बिएस्सी विलियमले एक एक गोल गरे।
जितसँगै पोखराले ६ खेलबाट ८ अंकसहित प्लेअफमा ठाउँ बनाएको हो ।
पराजित बुटवल भने एक अंकसहित यसअघि नै प्रतियोगिताबाट बाहिरिसकेको थियो । पोखराको जितसँगै अन्तिम खेल खेल्न बाँकी रहेको झापा एफसी पनि प्रतियोगिताबाट बाहिरिएको छ ।
झापाको पाँच खेलबाट चार अंक छ। अब ६ खेलबाट आठ अंक भएको काठमाडौं रेजर्स र एक खेल कम खेलेको चितवन एफसीमध्ये एक टोली प्लेअफमा पुग्नेछन् ।
चितवनले लिग चरणको अन्तिम खेल पहिलो क्वालिफायरमा स्थान बनाइसकेको साबिक उपविजेता धनगढी एफसीविरुद्ध खेल्नेछ । यो खेलमा गोलरहित बराबरी भए पनि चितवन प्लेअफमा पुग्नेछ। पराजित भए लिग चरणबाटै बाहिरिनेछ ।
