अर्थमन्त्रीको प्रश्न - संसद्मा छलफल हुनु निरङ्कुश भए लोकतन्त्र खोज्न कहाँ जाने ? [भिडियो]
हाम्रा कुरा
प्रकाशित २०८१ फागुन २१ बुधबार
681
Shares
काठमाडौँ । उपप्रधानमन्त्री एवं अर्थमन्त्री विष्णु पौडेलले संसद्मा पेस भएका विधेयकहरूको प्रक्रियामा त्रुटि नभएको बताएका छन् । बुधबार प्रतिनिधि सभामा पेस भएको ‘आर्थिक कार्यविधि तथा वित्तीय उत्तरदायित्व पहिलो संशोधन अध्यादेश २०८१’ माथि उठेका प्रश्नहरूको जवाफ दिँदै उनले यस्तो बताए ।
उनले सदनमा प्रस्तुत हुने विधेयकमाथि विरोध र समर्थन हुने बताए । विधेयकबारे छलफल गरेर संसद्ले उचित निर्णय गर्ने उनको भनाइ छ ।
उनले भने, ‘हामी राम्रो संवैधानिक अभ्यासमा छौँ । अध्यादेश सदनमा आउँछ, छलफल हुन्छ । समर्थन हुन्छ, विरोध हुन्छ । सभाले विवेक प्रयोग गरेर उचित ढङ्गले निर्णय गर्छ । त्यही प्रक्रियामा हामी छौँ ।’
अर्थमन्त्री पौडेलले संसद्मा प्रस्तुत विधेयक स्वेच्छाचारी वा निरङ्कुश नभएर सरकारले आवश्यक महसुस गरेर ल्याएको जिकिर गर्नुभयो । संसद्मा प्रस्ताव पेस गर्नु, छलफल गर्नु, संसद्ले नै निर्णय गर्नु निरङ्कुश हुन्छ भने लोकतन्त्रको परिभाषा खोज्न कहाँ जाने ? भन्दै प्रतिप्रश्न गरे ।
