पोखरा । बुटवलबाट पोखरा आउँदै गरेको पिकअप भ्यान आज बिहान स्याङ्जामा दुर्घटना हुँदा चालकको ज्यान गएको छ भने सहचालक गम्भीर घाइते भएका छन् । मृत्यु हुनेमा पाल्पा रम्भा गाउँपालिका वडा नं ३ का २६ बर्षीय मित्रलाल अर्याल छन् ।
दुर्घटनामा गम्भीर घाइते भएका अर्यालको गल्याङ नगर अस्पतालमा उपचारका क्रममा मृत्यु भएको जिल्ला प्रहरी कार्यालय स्याङ्जाले जनाएको छ ।
गम्भीर घाइते भएका पाल्पा रम्भा-३ का २३ वर्षीय राधेश्याम बस्यालको लुम्बिनी मेडिकल कलेज पाल्पामा उपचार भइरहेको छ । उनको गल्याङ नगर अस्पतालमा सामान्य उपचारपछि थप उपचारका लागि पाल्पा पठाइएको थियो ।
स्याङ्जा प्रहरीका सूचना अधिकारी डीएसपी हरिप्रसाद पौडेलका अनुसार लु३च ३३२४ नम्बरको पिक अप भ्यान आज बिहान करिब १ः१० बजे गल्याङ नगरपालिका वडा नं ११ खरिपानीस्थित सिद्दार्थ राजमार्गमा दुर्घटना भएको हो ।
भ्यान राजमार्गदेखि एक सय मिटर तल खसेको छ । दुर्घटनाको कारण खुल्न नसकेको र अनुसन्धान भइरहेको डीएसपी पौडेलले जानकारी दिए ।
