एभरेस्ट बैङ्कले फिदिम र फुङ्लिङ्गमा नयाँ शाखा सञ्चालनमा ल्यायो
हाम्रा कुरा
प्रकाशित २०८१ फागुन १० शनिबार
390
Shares
काठमाडौँ। एभरेस्ट बैङ्क लिमिटेडले पाँचथरको फिदिम र ताप्लेजुङको फुङ्लिङ्गमा आफ्ना १३०औँ र १३१औँ शाखा क्रमशः २०८१ फागुन ८ र ९ गते सञ्चालनमा ल्याएको छ। यसले गर्दा कोसी प्रदेशका पूर्वी पहाडी जिल्लाका ग्राहकहरूलाई अत्याधुनिक, दिगो र विश्वसनीय बैङ्किङ सेवा प्रदान गर्ने मार्ग सजिलो भएको छ।
फिदिम नगरपालिका वडा नं. १, पाँचथरमा आयोजित उद्घाटन कार्यक्रममा फिदिम नगरपालिकाका प्रमुख मित्र प्रसाद काफ्ले, एभरेस्ट बैङ्कका सञ्चालक किरण कुमार श्रेष्ठ, नायब प्रमुख कार्यकारी अधिकृत विजय कुमार शर्मा, र कोसी प्रदेशका प्रमुख सुधीर गौतम उपस्थित थिए। यस्तै, फुङ्लिङ्ग नगरपालिका वडा नं. ४, ताप्लेजुङमा भएको कार्यक्रममा नगरपालिका प्रमुख अमिर मादेनले शाखाको उद्घाटन गरे।
बैङ्कले यी दुई शाखा मार्फत स्थानीय ग्राहकहरूलाई सरल, सहज र प्रविधिमैत्री सेवा प्रदान गर्ने प्रतिबद्धता जनाएको छ। यसले गर्दा स्थानीय आर्थिक गतिविधिमा थप गतिशीलता आउने र समग्र आर्थिक विकासमा योगदान पुग्ने अपेक्षा छ। बैङ्कले भविष्यमा पनि वित्तीय पहुँचबाट टाढा रहेका क्षेत्रहरूमा शाखा विस्तार गर्ने योजना बताएको छ।
भारतको पन्जाब नेशनल बैङ्कसँगको संयुक्त साझेदारीमा स्थापित एभरेस्ट बैङ्कले हालसम्म १४ लाखभन्दा बढी ग्राहकलाई सेवा प्रदान गरिसकेको छ। बैङ्कको देशव्यापी सञ्जालमा १३१ शाखा, ४ एक्सटेन्सन काउन्टर, ७ प्रादेशिक कार्यालय, र १६७ एटिएम रहेका छन्। यसले मोबाइल, इन्टरनेट र एसएमएस बैङ्किङ जस्ता अत्याधुनिक सेवाहरू प्रदान गर्दै आएको छ।
साथै, बैङ्कले नेपाल सरकारको राजस्व सङ्कलनका लागि ३२ सङ्कलन केन्द्र सञ्चालन गर्दै आएको छ भने भारतको नयाँ दिल्ली लगायत अन्य मुलुकमा पनि यसको प्रतिनिधि कार्यालयहरू रहेका छन्।
यसरी, एभरेस्ट बैङ्कले आफ्नो सेवा विस्तार गर्दै देशभरका ग्राहकहरूलाई गुणस्तरीय बैङ्किङ सेवा प्रदान गर्ने प्रतिबद्धता कायम राखेको छ।
