म्याग्दी । म्याग्दीमा शनिबार बिहान जीप दुर्घटना हुँदा चालकको ज्यान गएको छ । मृत्यु हुनेमा बेनी नगरपालिका वडा नं ६ जरवुटाका ३५ वर्षीय तेजेन्द्र खत्री छन् ।
जिल्ला प्रहरी कार्यालय म्याग्दीका अनुसार शनिबार बिहान १ बजे बेनी नगरपालिका वडा नं ६ जरवुटामा ग१ज ५९९१ नम्बरको बोलेरो जीप दुर्घटना भएको हो ।
दुर्घटनामा गम्भीर घाइतेका खत्रीलाई उद्धार गरी उपचारका लागि बेनी अस्पताल पुर्याइए पनि चिकित्सकले मृत घोषणा गरेको प्रहरीले जनाएको छ ।
जीप रघुगंगा गाउँपालिकामा ४० मेगावाट क्षमताको रघुगंगा जलविद्युत् आयोजनाको सिभिल ठेकेदार भारतीय कम्पनी जेपी एशोसिएट्सको भएको बताइएको छ ।
खत्री राति घर फर्किनेक्रममा जीप दुर्घटना भएको हो । उनी जीप मुनि च्यापिएको अवस्थामा प्रहरीले उद्दार गरेको थियो । दुर्घटनाबारे अनुसन्धान भइरहेको म्याग्दी प्रहरीले जनाएको छ ।
