काठमाडौं । समानुपातिकको बन्द सूची पेश गर्नुअघि सत्तागठबन्धन दलले सिट बाँडफाँटको कामलाई रोकेका छन् । उनीहरु आफ्नो पार्टीको समानुपातिक उम्मेदवार छान्न व्यस्त रहेका छन् । नेपाली कांग्रेस, नेकपा माओवादी केन्द्र र नेकपा एकीकृत समाजवादी पार्टीहरु समानुपातिक उम्मेदवार छनोट गर्ने चरणमा प्रवेश गर्दा एमाले भने प्रत्यक्षकै निर्वाचन प्रचार प्रसारमा लागिसकेको छ । 

समानुपातिक उम्मेदवारको ‘सर्ट लिष्ट’ बनाउन लागि परे पनि प्रत्यक्षतर्फ पनि करिब ५६ जना उम्मेदवार सर्वसम्मत सिफारिस गरेर छनोट चरणमा प्रवेश गरेको हो । ‘एमाले प्रत्यक्ष र समानुपातिक दुवैतर्फ उम्मेदवार छनोटको चरणमा प्रवेश गरेको छ’, एमालेका पोलिटव्यूरो सदस्य ठाकुर गैरेले भने । 

उनकाअनुसार समानुपातिकमा भने क्षेत्र र संख्याभन्दा धेरै बढी सिफारिस भए पनि एमालेले पहिलो चरणमा ‘सर्ट लिष्ट’ बनाएर उम्मेदवार छनोट गर्ने भएको छ । तर प्रत्यक्षतर्फको ५६ सिटमा भने एमालेलाई सहज भएको छ । 

प्रतिनिधि सभा सदस्य निर्वाचनका लागि नेकपा एमालेबाट ५६ नेता सर्वसम्मत उम्मेदवार हुने भएका छन् । जिल्ला कमिटीबाटै माथिल्लो तहमा सर्वसम्मत सिफारिस भएका ५६ जनालाई केन्द्रले पनि सर्वसम्मत अनुमोदन गर्ने भएको हो । 

केन्द्रले जिल्लाको सिफारिस अनुमोदन गर्ने सम्भावना बढेपछि उनीहरू आफ्नो निर्वाचन क्षेत्र केन्द्रित हुन थालेका छन् ।  समानुपातिकमा करिब  ३ हजार नेताहरु सिफारिसमा परेपछि नेताहरु अचम्मित परेका छन् । 

नेताहरुले त्यो संख्या शुरुमै छनोट गरेर निर्वाचनमा आयोगमा पठाउने भएको छ । यसरी विभिन्न जिल्ला कमिटीबाट प्रतिनिधि सभा सदस्यका लागि सर्वसम्मत उम्मेदवार सिफारिस भएकामा पार्टी अध्यक्ष केपी शर्मा ओलीदेखि वरिष्ठ उपाध्यक्ष, उपाध्यक्ष, महासचिवलगायतका नेता छन् । ५६ जनामा कतिपय पहिलोपटक सिफारिस भएका हुन् । 

ओलीलाई झापा निर्वाचन क्षेत्र नम्बर ५ बाट सर्वसम्मत उम्मेदवार सिफारिस गरिएको छ । उनी यसअघि पनि सर्वसम्मत सिफारिसमा परेका थिए ।  अध्यक्ष ओलीका अतिरिक्त पार्टीका वरिष्ठ उपाध्यक्ष ईश्वर पोखरेल पनि काठमाडौं निर्वाचन क्षेत्र नम्बर ५ बाट सर्वसम्मत उम्मेदवार सिफारिस भएका छन् । 

यसैगरी उपाध्यक्षद्वय सुवासचन्द्र नेम्वाङ इलाम निर्वाचन क्षेत्र नम्बर २ बाट र विष्णु पौडेल रूपन्देही निर्वाचन क्षेत्र नम्बर २ बाट सर्वसम्मत उम्मेदवार सिफारिस भएका छन् । 

नेम्वाङ र पौडेल यसअघि पनि ती क्षेत्रबाट निरन्तर रुपमा चुनाव जित्ने नेताहरु हुन । महासचिव शंकर पोखरेल दाङ निर्वाचन क्षेत्र नम्बर २ बाट सर्वसम्मत उम्मेदवार सिफारिस भएका छन् । उनी यसअघि प्रदेशबाट चुनाव जितेर लुम्बिनी प्रदेशको मुख्यमन्त्री भएका थिए । 

यसपटक पोखरेल र माओवादीका उपाध्यक्ष कृष्णबहादुर महराबीच प्रतिस्पर्धा हुने सम्भावना छ । त्यसैगरी एमालेका पूर्व उपाध्यक्ष भीमबहादुर रावल अछाम १ बाट सर्वसम्मत उम्मेदवार सिफारिस भएका छन् ।

रावल आफैंले अहिलेसम्म निर्वाचन लड्ने घोषणा गरिसकेका छैनन् । एकल रूपमा सिफारिस भएका नेताहरू अहिले आ–आफ्नो निर्वाचन क्षेत्रमा क्रियाशील हुन थालेका छन् । 

उनीहरूले काठमाडौंमा क्रियाशील रहेका सम्पर्क मञ्च र अन्य संगठनलाई पनि परिचालन गर्न थालेका छन् । निर्वाचन आयोगले दशैं सकिएसँगै उम्मेदवार मनोनयन दर्ता कार्यक्रम सार्वजनिक गरेको छ । 

त्यसअघि नै पार्टीहरूले सबै उम्मेदवारको नाम टुंग्याइसक्नुपर्ने अवस्था छ । एमालेले प्रायः सर्वसम्मत भएका र नभएकाको पनि नाम छनोट गरी उम्मेदवार तय गर्नेछ । 

एमाले सचिवालय र स्थायी कमिटी बैठकले उम्मेदवारको नाम तय गर्नेछ । अहिले सिफारिसमा परेका नेताको अवस्थाबारे जानकारी लिने काम भइरहेको एमाले स्रोतले जनाएको छ । सर्वसम्मत भएकामध्ये कतिपय नेताहरु पहिलो पटक निर्वाचनमा भाग लिँदै छन् । 

सर्वसम्मत रुपमा सिफारिसमा परेकामध्ये एमालेबाट पहिलो पटक निर्वाचनमा भाग लिँदैछन् । पाल्पा २ बाट ठाकुर गैरे, प्यूठानबाट सूर्य थापा, रुपन्देहीबाट खिमलाल भट्टराई, मानवीर राईले पहिलो पटक निर्वाचन फेस गर्दैछन् । 

त्यसैगरी काठमाडौंबाट मणिराम फुयाल, चितवनबाट रामप्रसाद न्यौपाने, डोल्पाबाट बम्दी क्वाँरा बोहोरा, जुम्लाबाट रतननाथ योगी पहिलो पटक डेब्य् गर्दैछन् । एमालेभित्र धेरै नेताहरुले यसपटक डेब्यु गर्ने तयारीमा रहेका छन् । 

सिफारिसमा परेका तर सर्वसम्मत नभएका नेताहरुमा दैलेखबाट विष्णु रिजाल, गुल्मी २ बाट राजेन्द्र अर्याल, कैलाली १ बाट द्धारिका न्यौपाने, बझाङबाट ऐन महर, रामेछापबाट माधव ढुंगेल लगयातका नेताहरु डेब्युको तयारीमा रहेका छन् । यद्यपि उनीहरुले टिकट पाउने नपाउने विषयमा अझै निचोडमा पुगेको छैन । 

सर्वसम्मत सिफारिस भएकाहरु–   

झापा १ –रविन कोइराला

झापा ५  केपी शर्मा ओली

इलाम १ – महेश बस्नेत

इलाम २ – सुवास नेम्बाङ

मोरङ २ – ऋषिकेश पोखरेल

मोरङ ३ – भानुभक्त ढकाल

मोरङ ४  – विनोद ढकाल

सुनसरी १  – जयकुमार राई

सुनसरी ३  – भगवती चौधरी

धनकुटा – राजेन्द्र राई

सोलुखुम्बु  – मानवीर राई

पर्सा ३ – राजकुमार गुप्ता

बारा २  – बलवीर चौधरी

बारा ४  – देवनारायण चौधरी

रौतहट ३  – प्रभु साह

सर्लाही २  – राजनारायण साह

धनुषा ३  – जुली महतो

धनुषा ४  – रघुवीर महासेठ

सिराह ३  – लीलानाथ श्रेष्ठ

काभ्रे २  – गोकुल बाँस्कोटा

काठमाडौं २  – मणिराम फुयाँल

काठमाडौं ३  – कृष्ण राई

काठमाडौं ४  – राजन भट्टराई

काठमाडौं ५  – ईश्वर पोखरेल

नुवाकोट १  – बद्री मैनाली

चितवन ३  – रामप्रसाद न्यौपाने

नवलपुर २  – तिलकबहादुर महत

म्याग्दी  – हरिकृष्ण श्रेष्ठ

मनाङ  – पाल्देन छोपाङ गुरुङ

पाल्पा २  – ठाकुर गैरे

गुल्मी १  – प्रदीप ज्ञवाली

अर्घाखाँची  – टोपबहादुर रायमाझी

प्युठान  – सूर्य थापा

दाङ २  – शंकर पोखरेल

कपिलवस्तु २  – बृजेशकुमार गुप्ता

कपिलवस्तु ३  – मंगलप्रसाद गुप्ता

रूपन्देही १  – छविलाल विश्वकर्मा

रूपन्देही २  – विष्णुप्रसाद पौडेल

रूपन्देही ४  – कृष्णप्रसाद भुसाल

रूपन्देही ५  – खिमलाल भट्टराई

रोल्पा  – पूर्ण बुढामगर

डोल्पा  – बम्दी क्वाँरा बोहोरा

हुम्ला  – दल रावल

मुगु  – मोहन बानियाँ

जुम्ला  – रतननाथ योगी

कालिकोट  – नागिन्द्र शाही

सल्यान  – गुलाबजंग शाह

दार्चुला  – गणेश ठगुन्ना

बैतडी  – दमोदार भण्डारी

डडेलधुरा  – पठानसिंह बोहोरा

डोटी  – चक्र मल्ल

अछाम १  – भीमबहादुर रावल

अछाम २  – यज्ञराज बोगटी

कैलाली ३  – गौरीशंकर चौधरी

कैलाली ४  – लेखराज भट्ट

कैलाली ५  – नारदमुनि राना