काठमाडौं । राष्ट्रिय प्रजातन्त्र पार्टी (राप्रपा) को एकता महाधिवेशन काठमाडौंमा चलिरहेको छ । हिजोदेखि शुरु भएको महाधिवेशनले नयाँ नेतृत्व चयन गर्दैछ । उम्मेदवारी घोषणा धमाधम भइरहेको छ ।
उक्त क्रममा नेपाली चलचित्रकी अभिनेत्री रेखा थापाले पनि महामन्त्रीमा उम्मेदवारी दिने भएकी छिन् । उनले राजेन्द्र लिङ्देन प्यानलबाट उम्मेदवारी दिने बताइएको छ। यसअघि लिङ्देनको प्यानलबाट धबल शमशेर राणाले उम्मेदवारी दिने घोषणा भइसकेको छ ।
राप्रपाको विधानअनुसार महामन्त्रीमा एक महिलासहित तीन जना निर्वाचन गर्ने प्रावधान छ। लिङ्देन प्यानलबाट गोविन्द खनियाको नाम पनि आएको छ । विधानअनुसार नै रेखा थापाले महिलातर्फ आफ्नो दाबेदारी प्रस्तुत गर्ने बताइएको छ।
महाधिवेशनमा दुई खेमा प्यानल बनाएर उत्रदैछन् । कमल थापा प्यानलबाट कुन्ती शाही र भुवन पाठकले उम्मेदवारी घोषणा गरिसकेका छन् ।
रेखा थापाको उम्मेदवारी परेका खण्डमा उनको भिडन्त कुन्ती शाहीसँग हुनेछ ।
राप्रपामा एक सय ९९ सदस्यीय केन्द्रीय कार्यसमितिमध्ये एक सय ४९ जनाको लागि निर्वाचन हुँदैछ। बाँकी सदस्य नयाँ कार्यसमितिले मनोनयन गर्नेछ ।
