काठमाडौँ । बुधबार दिउँसो ताप्लेजुङमा भएको डाइनेष्टी एयरको हेलिकप्टर दुर्घटनामा परी निधन भएका संस्कृति, पर्यटन तथा नागरिक उड्डयनमन्त्री रवीन्द्र अधिकारीसहित सातै जनालाई श्रद्धाञ्जली दिनका लागि शुक्रबार बिहान राजधानीको टुँडिखेलमा पार्थिक शरीर राखिँदैछ । 

बिहान ८ बजेदेखि तीन घण्टासम्म चल्ने श्रद्धाञ्जलीका लािग राष्ट्रपति विद्यादेवी भण्डारीदेखि सर्वसाधारण पुग्ने जानकारी दिइएको छ । 

त्यसैगरी उपराष्ट्रपति नन्दबहादुर पुन, प्रधानमन्त्री केपी शर्मा ओली, मन्त्रीहरु, उच्च पदस्थ अधिकारी लगायत व्यक्ति पुग्नेछन् । 

विभिन्न दलका शीर्ष नेताहरु समेत श्रद्धाञ्जली  दिन टुँडिखेल पुग्नेछन् । त्यस्तै विभिन्न क्षेत्रका व्यक्तिहरु दुर्घटनामा परेकाले सबै क्षेत्रका व्यक्तिहरु श्रद्धाञ्जलीका लागि पुग्नेछन् । 

ढिला गरी सकिएको थियो शव परीक्षण
बुधबार भएको घटना भए पनि घटनास्थलबाट शव संकलन र काठमाडौं ल्याउन नै समस्या भएको थियो । सातै शव बिहीबार दिउँसो मात्र काठमाडौं ल्याउन सम्भव भएको थियो । 

त्यसपछि पोष्टमार्टम गर्न अझै बढी समस्या भयो । मन्त्री अधिकारीसहित चार जनाको शव पहिचान भए पनि बाँकी तीन जनाको शव पहिचानमा समस्या भएको थियो । 

त्यसकारणले शवको डीएनए परीक्षण गर्दा समय लाग्यो । बिहीबार दिउँसो २ः३० देखि निरन्तर परीक्षण गरिरहेका चिकित्सकले राति १ः३० बजेमात्र परीक्षण सकेका थिए । 

सामूहिक श्रद्धाञ्जलीपछि शव आफन्तलाई 
११ बजेसम्म सातै शवलाई सामूहिक राखेर श्रद्धाञ्जली दिएपछि आफन्तहरुलाई बुझाइने छ । मन्त्री अधिकारीको शव भने गृहनगर कास्कीको पोखरा लगेर पुनः श्रद्धाञ्जलीका लागि राखिने छ । 

त्यसपछि मात्र राजकीय सम्मानका साथ मन्त्री अधिकारीको अन्तिम संस्कार गरिने छ । 

दुर्घटनामा मन्त्री अधिकारी, यति एयरलाइन्सका प्रबन्ध निर्देशक आङछिरिङ शेर्पा, नेपाल नागरिक उड्डयन प्राधिकरणका उपमहानिर्देशक वीरेन्द्रप्रसाद श्रेष्ठ र निर्देशक ध्रुब भोछिभोया, प्रधानमन्त्री तथा मन्त्रिपरिषद् कार्यालयका उपसचिव युवराज दाहाल, पाइलट प्रभाकर केसी र मन्त्री अधिकारीका सुरक्षाकर्मी अर्जुनकुमार घिमिरेको निधन भएको थियो ।

यति र तारा एयरलाइन्सले आफ्ना सबै उडान शुक्रबार नउडाउने जनाएको छ ।