काठमाडौं । दुर्घटनाग्रस्त हेलिकप्टरका यात्रुहरूका शव काठमाडौँ ल्याउनका लागि आवश्यक कानूनी प्रक्रिया पूरा गरी नेपाली सेनाको हेलिकप्टर तयार रहे पनि मौसमले गर्दा हेलिकप्टर उड्न सकेको छैन ।
ताप्लेजुङमा निरन्तर हिमपात हुनुका साथै विमानस्थलको भिजिबिलिटी कम हुँदा उडान भर्न सक्ने अवस्था छैन । मुलुकभरकै मौसममा खरावी आइरहँदा अनुकुल मौसमको प्रतिक्षा गर्दा ढिलाइ भएको छ ।
बिहीबार बिहान ८ः३० बजे नै घटनास्थलबाट बाँँकी रहेका तीन शव सुकेटार विमानस्थल ल्याइए पनि त्यहाँबाट सबै सात शव काठमाडौं ल्याउन कठिन भएको हो ।
प्रमुख जिल्ला अधिकारी अनुज भण्डारीले मौसममा सुधार आउने बित्तिकै शवहरू काठमाडौँ पठाइने बताएका छन् ।
बुधबार दिउँसो संस्कृति, पर्यटन तथा नागरिक उड्डयन मन्त्री रवीन्द्र अधिकारीसहित सातजना चढेको डाइनेस्टी एयरको हेलिकप्टर सिस्नेभीर नजिकै दुर्घटनाग्रस्त हुँदा सबै सातजनाको निधन भएको थियो ।
शव काठमाडौं ल्याइपछि त्रिवि शिक्षण अस्पतालमा पोष्टमार्टम गरिने छ ।
