काठमाडौं । पोर्चुगिच फुटबल स्टार क्रिस्टियानो रोनाल्डोले दुई गोल गरेपनि युभेन्टसले इटालियन सिरिए फुटबलमा जित हासिल गर्न सकेन । शनिबार रातिको खेलमा युभेन्टस पर्मासँग ३–३ गोलको बराबरी खेलेको छ ।
युभेन्टसका ड्यानियल रुगानीले अर्को गोल थपे । पर्माका जेरभिन्होले दुई तथा एन्टेनियो बारिल्लाले एक गोल थपे ।
युभेन्टसको घरेलु मैदानमा भएको खेलको ३६औं मिनेटमा रोनाल्डोले गोल गर्दै घरेलु टोलीलाई पहिलो हाफमा १–० को सुरुवाती अग्रता दिलाए ।
६२औं मिनेटमा ड्यानियल रुगानीले गोल गरेपछि युभेन्टस्ले २–० को अग्रता बनायो । त्यसको दुई मिनेटपछि पर्माका एन्टेनियो बारिल्लाले गोल गर्दै पर्मालाई खेलमा फर्काउने संकेत दिए ।
पुनः दुई मिनेटपछि नै रोनाल्डोले व्यक्तिगत दोस्रो तथा टिमका लागि तेस्रो गोल गर्दै युभेन्टसलाई ३–१ ले अघि बढाए ।
७४औं मिनेटमा जेरभिन्होले गोल गर्दै पर्मालाई ३–२ को अन्तरमा ल्याए । इन्जुरी समयको थप गरिएको तेस्रो मिनेटमा जेरभिन्होले गोल गर्दै खेललाई ३–३ गोलको बराबरीमा ल्याए ।
योसंगै पर्माले युभेन्टसबाट अंक खोस्न सफल भयो । बराबरीपछि शीर्षस्थानमा रहेको युभेन्टसको २२ खेलबाट ६० अंक पुगेको छ । युभेन्टसले दोस्रो स्थानको नेपोलीलाई ९ अंकले पछि पारेको छ । पर्मा २९ अंक जोडेर १२औं स्थानमा यथावत छ ।
शनिबार रातिका अन्य खेलहरु
इम्पोली २–२ चिएभो
नापोली ३–० साम्पदोरिया
