विश्वकपको मुखैमा डिफेन्डिङ च्याम्पियन जर्मनी स्तव्ध
प्रकाशित २०७५ जेठ २० आइतबार
499
Shares
काठमाडौं । रुस विश्वकप सुरु हुन ११ दिनमात्र बाँकी रहँदा अहिले धमाधम मैत्रिपूर्ण खेलहरु भइरहेका छन् । मैत्रिपूर्ण खेलमा डिफेन्डिङ च्याम्पियन जर्मनी स्तव्ध भएको छ । जर्मनी अस्ट्रियासँग २–१ ले पराजित भएको हो ।
अष्ट्रियाको मैदानमा भएको खेलमा सुरुवाती अग्रता लिएर पनि जर्मनीले हारको सामना गर्नुपर्यो । ११ औँ मिनेटमै मेसुट ओजिलको गोलबाट जर्मनीले अग्रता लियो ।
पहिलो हाफसम्म अग्रता लिइरहेको जर्मनीले दोस्रो हाफमा भने २ गोल खायो । अष्ट्रियाका लागि ५३ औँ मिनेटमा मार्टिन हिन्टरेगरले बराबरी गोल फर्काए । ६९ औँ मिनेटमा एलेसान्ड्रो शफले गोल गर्दै अस्ट्रियालाई २–१ को जित दिलाए ।
भारी वर्षाले खेल ढिलागरी सुरु भएको थियो ।
विश्वकपमा जर्मनी समूह एफ मा छ । यो समूहमा मेक्सिको, स्वीडेन र दक्षिण कोरिया रहेका छन् । जर्मनीले जुन १५ मा मेक्सिकोसँग खेलेर विश्वकप यात्राको सुरुवात गर्नेछ ।
शनिबार रातिको खेलमा मेक्सिकोले मैत्रिपूर्ण खेलमा स्कटल्याण्डलाई १–० ले हरायो । त्यस्तैगरी स्वीडेनले डेनमार्कसंग गोलरहित बराबरी खेल्यो ।
