महोत्तरी । राष्ट्रिय जनता पार्टी राजपाको अध्यक्ष मण्डलका संयोजक महन्थ ठाकुरविरुद्ध आफ्नै पार्टीबाट बागी उम्मेदवारी परेको छ ।
महोत्तरी क्षेत्र नम्बर ३ बाट चुनाव लड्न लागेको ठाकुरविरुद्ध राजपाकै नेता एवं निवर्तमान सांसद चन्द्रेश्वर झाले उम्मेदवारी हालेका हुन् ।
२०७० को संविधानसभा निर्वाचनमा स्वतन्त्र उम्मेदवार बनेर जितेका झाले फेरि पनि स्वतन्त्र उम्मेदवारी दिएका हुन् ।
झा केही महिनाअघिमात्र राजपा प्रवेश गरेका थिए । राजपा प्रवेश गरेर उनले महोत्तरीमा स्थानीय तहको चुनावमा राजपालपाई जिताउन सघाए । यद्यपि, टिकट वितरण गर्दा काखा र पाखा गरेको भन्दै उनले स्वतन्त्र उम्मेदवारी दिएका हुन् ।
यसअघि स्वतन्त्र उम्मेदवार बनेर जितेका झाले उम्मेदवारी दिएकाले राजपाको अध्यक्ष मण्डलको संयोजक रहेका ठाकुर समस्यामा परेका छन् ।
महात्तरी सदरमुकाम जलेश्वर लगायतका क्षेत्रमा ठाकुरतर्फ संकेत गर्दै ‘बाहिरिया उम्मेदवार भगाउँ’भन्ने नारा लेखिएका व्यानर टाँगिएका छन् ।
सर्लाही ६ बाट दुई पराजय व्यहोरेका ठाकुरले यो पटक निर्वाचन क्षेत्र फेरेका हुन् । उनीविरुद्ध महोत्तरीमा नाराबाजी हुन थालिसकेको छ ।
