कञ्चनपुर । कञ्चनपुरमा दोस्रो चरणको मत परिणाम मिश्रित किसिमको आएको छ । ९ वटा स्थानीय तहमध्ये  २–२ स्थानीय तहमा नेपाली कांग्रेस र एमालेले विजय गरेको छ भने १ स्थानीय तहमा नेकपा माओवादी केन्द्रले जीत हात पारेको छ ।

महाकाली पारीको महाकाली नगरपालिका र शुक्लाफाँटा नगरपालिकामा नेपाली काँग्रेसले विजय गरेको हो ।  वेदकोट नगरपालिका र बेल्डाँडी गाउँपालिकामा एमालेले जितेको छ ।

लालझाँडी गाउँपालिकामा नेकपा माओवादी केन्द्रले जितेको छ । अन्य स्थानीय तहमा मत गणना भइरहेको छ ।

यसैबीच जिल्लाको शुक्लाफाँटा नगरपालिका प्रमुखमा नेपाली काँग्रेस र वेदकोटमा नेकपा एमाले विजयी भएका छन् । शुक्लाफाँटा नगरपालिकामा नेपाली काँग्रेस विजयी भएको छ । काँग्रेसका उम्मेदवार दिलबहादुर ऐर मेयरमा विजयी भएका हुन् ।

शुक्लाफाँटाका निर्वाचन अधिकृतको कार्यालयले  दिएको जानकारी अनुसार काँग्रेसका मेयर  पदमा उमेदवार दिलबहादुर ऐर विजयी भएका हुन् । उपमेयरमा भने एमालेकी तुलसादेवी हमाल विजयी भएकी छन्  ।

निर्वाचन अधिकृत प्रेम कुँवरका अनुसार ऐरले आफ्ना निकटतम प्रतिद्वन्द्वी नेकपा एमालेका रण बहादुर महरालाई १ हजार २ सय २२ मतअन्तरले हराउदै मेयरमा निर्वाचित भएका हुन् । ऐरले ६ हजार ४ सय ३२ र महराले ५ हजार ४ सय २९ मत ल्याएका छन्  ।

 उप मेयरमा एमालेका उम्मेदवार तुलसादेवी हमालले नेपाली काँग्रेसका उम्मेदवार धर्मादेवी बिष्टलाई ८३ मतको अन्तरले हराउदै उप मेयरमा निर्वाचित भएकी हुन् ।

हमालले ५ हजार २ सय ९३ मत  र बिष्टले ५ हजार २ सय १० मत प्राप्त गरेका थिए । शुक्लाफाँटामा कुल २४ हजार ७ सय ५७ मतदाता मध्ये १८ हजार ५ सय १८ मत खसेका थिए ।

यसैगरी सोमबार सम्पन्न मत गणना अनुसार वेदकोट नगरपालिकाको प्रमुख र उपप्रमुखमा एमालेका उम्मेदवार विजयी भएका हुन् । वेदकोटका निर्वाचन अधिकृत खेमराज भट्टले बेदकोट प्रमुखमा एमालेका अशोक बहादुर चन्द र उप प्रमुखमा सुशिला सिह निर्वाचित भएको बताए ।

उनका अनुसार चन्दले आफ्ना निकटमत प्रतिद्वन्द्वी नेपाली काँग्रेसका भोजराज बोहरालाई ५ सय ७५ मतको अन्तरले हराउदै मेयरमा निर्वाचित भएका हुन् । चन्दले ६ हजार ६ सय ६ र बोहराले ६ हजार ३१ मत ल्याएका थिए ।

उपमेयरमा एमालेकै शुशिला सिहले आफ्ना निकटतम प्रतिद्वन्द्वी नेपाली काँग्रेसका तुलसी जोशीलाई १ हजार ३ सय २८ मतले हराउदै उपमेयरमा निर्वाचित भएकी छिन् ।

सिहले ६ हजार ८ सय ५४ र जोशीले ५ हजार ५ सय २७ मत ल्याएकी थिईन् । वेदकोटमा कुल २६ हजार ३ सय ४६ मतदाता मध्ये १९ हजार ५१ मत खसेका थिए ।