काठमाडौँ । सिरियाको दक्षिणी प्रान्त दारास्थित अबिदिन गाउँमा इजरायली सेनाको पछिल्लो घुसपैठ र त्यसपछि भएको भीषण गोलाबारीका कारण स्थानीय बासिन्दाले ठूलो त्रास र विस्थापनको सामना गर्नुपरेको छ। विगत केही महिनादेखि यस क्षेत्रमा इजरायली सेनाको गस्ती सामान्य जस्तै बने पनि आइतबारको घटनाले भने नयाँ र गम्भीर मोड लिएको छ। 

स्थानीय बासिन्दाका अनुसार इजरायली सेनाले अबिदिन गाउँ नजिकै आफ्नो उपस्थितिलाई स्थायी बनाउन खोजेपछि स्थानीयले त्यसको कडा प्रतिकार गरेका थिए। गाउँलेहरूले सैन्य वाहनहरूको आवागमन रोक्न सडकमा ढुङ्गा राखेर अवरोध सिर्जना गर्नुका साथै युवा तथा बालबालिकाहरूले इजरायली सेनामाथि ढुङ्गा प्रहार गरी साङ्केतिक विरोध जनाएका थिए।

यस प्रतिरोधको केही घण्टापछि इजरायली सेनाले तोप र हेलिकप्टर प्रयोग गरी गाउँमा आक्रमण गरेको सिरियाली सरकारी समाचार संस्था ‘साना’ र सिरियाली अब्जर्भेटरी फर ह्युमन राइट्सले जनाएका छन्। इजरायली गोलाबारीका कारण त्रसित बनेका दर्जनौँ परिवार रातारात आफ्नो थातथलो छाडेर सुरक्षित स्थानतर्फ भाग्न बाध्य भएका थिए। 

८६ वर्षीय स्थानीय बासिन्दा खालिद महमुद अल–रियाशेले पहिले इजरायली सेना गाउँमा आउने र जाने गरे पनि यसपटक गाउँमै बस्ने मनसाय देखाएकाले आफ्ना छोराछोरी र युवाहरूले ढुङ्गामुढा गरेर धपाएको बताए। उनले यो आफ्नो गाउँमा इजरायली सेनाका लागि कुनै ठाउँ छैन भन्ने स्पष्ट सन्देश भएको उल्लेख गरे।

अर्का स्थानीय अली अल–अबिदिनले इजरायली सेनाले घरहरूमा प्रवेश गरी खानतलासी गर्नेसम्मका कार्य सहँदै आए पनि गाउँमै बस्न खोज्नु आफूहरूका लागि ‘लक्ष्मण रेखा’ पार गर्नु सरह भएको बताए। यो आफ्नो जमिन र जीविकोपार्जनको आधार भएकाले उनीहरू यहाँ बस्न थालेपछि आफूहरू कहाँ जाने भन्दै उनले चिन्ता व्यक्त गरे। २० वर्षीय मोमेन रियाशेका अनुसार इजरायली सेनाले गाउँ प्रवेश गर्न खोज्दा स्थानीयले अवरोध गरेपछि सेनाले प्रत्यक्ष गोलीबारी समेत गरेको थियो।

सोमवार संयुक्त राष्ट्रसङ्घीय डिसइंगेजमेन्ट अब्जर्भर फोर्सका शान्ति सैनिकहरूले अबिदिन क्षेत्रमा गस्ती गरेका छन्। इजरायली आक्रमण रोकिएपछि विस्थापित भएका केही परिवारहरू अहिले बिस्तारै गाउँ फर्कन थालेका छन्। यसैबीच, सिरियाली परराष्ट्र मन्त्रालयले दारा र छिमेकी कुनेत्रा प्रान्तमा भएको इजरायली घुसपैठ र गोलाबारीको कडा निन्दा गरेको छ। 

मन्त्रालयले सन् १९७४ को सैन्य पृथकीकरण सम्झौताको सम्मान गर्न र इजरायली उल्लङ्घन रोक्न संयुक्त राष्ट्रसङ्घ र अन्तर्राष्ट्रिय समुदायसँग अपिल गरेको छ। सन् २०२४ को अन्त्यमा बसर अल–असदको प्रशासन ढलेयता दक्षिण सिरियामा इजरायली सैन्य गतिविधि र आक्रमणका घटनाहरूमा निकै वृद्धि भएको छ।