शान्ति सम्झौताको तयारीबीच इरानको प्रतिक्रिया- सहमति भए पनि 'गहिरो अविश्वास' कायमै
हाम्रा कुरा
प्रकाशित २०८३ असार १ सोमबार
286
Shares
काठमाडौँ । मध्यपूर्वमा जारी युद्ध अन्त्य गर्ने उद्देश्यका साथ अमेरिका र इरानबीच अन्तरिम शान्ति सम्झौताको तयारी भइरहँदा इरानले संयुक्त राज्य अमेरिकाप्रति आफ्नो 'गहिरो अविश्वास' कायमै रहेको स्पष्ट पारेको छ। इरानको विदेश मन्त्रालयले सोमबार औपचारिक प्रतिक्रिया दिँदै सहमति हुनु सकारात्मक भए पनि वासिङ्टनप्रति तेहरानको दृष्टिकोणमा बदलाब नआएको जनाएको हो।
इरानी विदेश मन्त्रालयका प्रवक्ता इस्माइल बघाईले तेहरानमा आयोजित साप्ताहिक पत्रकार सम्मेलनमा बोल्दै अमेरिकी नीतिहरूको आलोचना गरे।
प्रवक्ता बघाईले भने, “दुर्भाग्यवश, यो स्वीकार गर्नैपर्छ कि संयुक्त राज्य अमेरिकाप्रति इरानको गहिरो अविश्वास अमेरिकी नेताहरूको लामो इतिहास र विगतका गलत कामका कारण उत्पन्न भएको हो। अमेरिकाले इरानी जनताको विश्वास जित्न अझै धेरै लामो यात्रा तय गर्न बाँकी छ।”
प्रवक्ता बघाईले सन् २०२६ फेब्रुअरीको अन्त्यतिर शुरू भएको क्षेत्रीय युद्ध रोक्ने पहल र कूटनीतिक प्रयासका लागि अहिले तयार पारिएको प्रस्तावको ढाँचा अन्तिम समाधान नभएको स्पष्ट पारे। उनले हालको मस्यौदा र सहमति केवल 'तनाव कम गर्ने र युद्ध अन्त्य गर्ने दिशामा चालिएको एक कदम मात्र' भएको टिप्पणी गरे।
आगामी शुक्रबार जेनेभामा हुन लागेको ऐतिहासिक उच्च स्तरीय वार्ता र शान्ति सम्झौताको पूर्वसन्ध्यामा इरानका तर्फबाट यस्तो प्रतिक्रिया आएको हो। यसअघि इजरायलले पनि यस सम्झौताले आफ्नो सुरक्षा सुनिश्चित नगर्ने भन्दै गाजा, लेबनान र सिरियामा कब्जा गरेको भूमिबाट पछि नहट्ने कडा अडान सार्वजनिक गरिसकेको छ। मुख्य दुई पक्षबीच कूटनीतिक सहमति भए पनि एक-अर्काप्रतिको ऐतिहासिक अविश्वास र इजरायलको असन्तुष्टिका कारण मध्यपूर्वको स्थायी शान्तिमा अझै चुनौती देखिन्छ।
