काठमाडौँ। एनआईसी एशिया बैङ्कले आफ्नो संस्थागत सामाजिक उत्तरदायित्व कार्यक्रमअन्तर्गत विभिन्न परोपकारी संस्था तथा सामुदायिक विद्यालयहरूलाई आवश्यक सहयोग सामग्री प्रदान गरेको छ। बैङ्कले झापाको बिर्तामोडस्थित परोपकार तथा अनुसन्धान केन्द्रद्वारा सञ्चालित हाम्रो साझा घरलाई फर्निचर तथा बारा जिल्लाको निजगढस्थित श्री सत्यश्वर शिव शक्ति आधारभूत विद्यालय र झापाको मेचीनगरस्थित श्री अरनिको माध्यमिक विद्यालयलाई शैक्षिक सामग्री उपलब्ध गराएको हो।

ज्येष्ठ २१ गते आयोजित एक कार्यक्रममा बैङ्कका केन्द्रीय सञ्चालन विभाग प्रमुख प्रकाश श्रेष्ठ र बिर्तामोड क्षेत्रीय प्रमुख डेनराज सुब्बाले हाम्रो साझा घर की अध्यक्ष विष्णु दिदी कार्कीलाई शय्या (बेड) हस्तान्तरण गरेका थिए। उक्त संस्थाले हाल ४४ भन्दा बढी असहाय, अशक्त तथा ज्येष्ठ नागरिकलाई आवास, भोजन र संरक्षणको व्यवस्था गर्दै आएको छ।

त्यसै गरी, ज्येष्ठ २२ गते सम्पन्न कार्यक्रममा वीरगन्ज क्षेत्रीय प्रमुख गोपालप्रसाद सुवेदीले श्री सत्यश्वर शिव शक्ति आधारभूत विद्यालय का प्रधानाध्यापक उमेश कुमार स्वर्णकारलाई बहुपयोगी चल कम्प्युटर (ल्यापटप) र प्रदर्शन यन्त्र (प्रोजेक्टर) हस्तान्तरण गरे। सोही दिन अर्को कार्यक्रममा केन्द्रीय सञ्चालन विभाग प्रमुख प्रकाश श्रेष्ठ तथा बिर्तामोड क्षेत्रीय प्रमुख डेनराज सुब्बाले श्री अरनिको माध्यमिक विद्यालय का प्रधानाध्यापक विशाल भट्टराईलाई स्मार्ट बोर्ड र बहुपयोगी चल कम्प्युटर (ल्यापटप) प्रदान गरेका थिए।

बैङ्कका अनुसार, श्री सत्यश्वर शिव शक्ति आधारभूत विद्यालयमा २६३ भन्दा बढी तथा श्री अरनिको माध्यमिक विद्यालयमा ३५० भन्दा बढी विद्यार्थी अध्ययनरत छन्।

बैङ्कले उपलब्ध गराएको सहयोगबाट हाम्रो साझा घर मा आश्रित असहाय, अशक्त तथा ज्येष्ठ नागरिकहरूको दैनिक जीवन थप सहज, सुरक्षित र स्वास्थ्यकर बन्ने विश्वास व्यक्त गरेको छ। साथै, विद्यालयहरूलाई प्रदान गरिएका शैक्षिक सामग्रीले डिजिटल शिक्षण अभ्यासलाई सुदृढ बनाउन, विद्यार्थीहरूको सहभागिता बढाउन तथा गुणस्तरीय शिक्षामा सबैको पहुँच विस्तार गर्न महत्त्वपूर्ण योगदान पुग्ने बैङ्कको अपेक्षा रहेको छ।