सरकारले बाजुरा र हुम्लाको सीमा विवाद अध्ययन गर्न गठन गर्यो समिति
हाम्रा कुरा
प्रकाशित २०८३ जेठ १० आइतबार
375
Shares
तस्बिर फाइल
काठमाडौँ । सरकारले बाजुरा र हुम्ला जिल्लाको सीमासम्बन्धी प्राविधिक पक्षको अध्ययन गरी प्रतिवेदन पेस गर्न नापी विभागका उपमहानिर्देशक सुशील डङ्गोलको संयोजकत्वमा समिति गठन गरेको छ।
भूमि व्यवस्था, सहकारी, सङ्घीय मामिला तथा सामान्य प्रशासन मन्त्री प्रतिभा रावलको अध्यक्षतामा आज सिंहदरबारमा बसेको बैठकले उक्त समिति गठन गर्ने निर्णय गरेको हो।
गठित समितिमा प्रधानमन्त्री तथा मन्त्रिपरिषद्को कार्यालय, गृह मन्त्रालय, कानून, न्याय तथा संसदीय मामिला मन्त्रालय, र भूमि व्यवस्था, सहकारी, सङ्घीय मामिला तथा सामान्य प्रशासन मन्त्रालयका तर्फबाट एक-एक जना प्रतिनिधि सदस्य रहनेछन्।
यसका साथै कर्णाली प्रदेश र सुदूरपश्चिम प्रदेशका मुख्यमन्त्री तथा मन्त्रिपरिषद्को कार्यालयका तर्फबाट पनि एक-एक जना प्रतिनिधिलाई सदस्यका रूपमा समावेश गरिएको छ। नापी विभागका निर्देशकलाई भने यस समितिको सदस्य–सचिवको जिम्मेवारी सुम्पिएको छ।
सिंहदरबारमा आयोजित उक्त बैठकमा भूमि मन्त्रालयका सचिव मदन भुजेल, प्रधानमन्त्री वालेन्द्र शाहका प्रेस तथा अनुसन्धान विज्ञ दीपा दाहाल, गृह मन्त्रालयका सहसचिव आनन्द काफ्ले, र भूमि व्यवस्था, सहकारी, सङ्घीय मामिला तथा सामान्य प्रशासन मन्त्रालयका सहसचिव प्रकाश दाहाल सहभागी थिए।
यस्तै बैठकमा नापी विभागका महानिर्देशक प्रकाश जोशी, भूमि व्यवस्था मन्त्रालयका उपसचिव भिम बुढा, नापी विभागका निर्देशक दयानन्द जोशी र नापी अधिकृत ज्योति ढकालको पनि उपस्थिति रहेको थियो।
