काठमाडौँ । अमेरिकी राष्ट्रपति डोनाल्ड ट्रम्पको आगामी चीन भ्रमणले इरानसँगको सैन्य र कूटनीतिक रणनीतिमा नयाँ मोड ल्याएको छ। आगामी मे १४ र १५ का लागि तय गरिएको बेइजिङ भ्रमणलाई प्राथमिकतामा राख्दै ह्वाइट हाउसले इरानसँगको द्वन्द्व व्यवस्थापनमा सावधानीपूर्वक सन्तुलन खोजिरहेको विभिन्न सञ्चारमाध्यमले उल्लेख गरेका छन्।

एनबिसी न्यूजका अनुसार ह्वाइट हाउसले यो भ्रमणलाई अत्यन्तै महत्त्वपूर्ण मानेको छ र द्वन्द्वका कारण यसअघि नै एक पटक स्थगित भइसकेको भ्रमणलाई अब पुनः पछाडि सार्ने पक्षमा प्रशासन छैन। इरानसँग सम्बन्धित सैन्य विकल्पहरूको मूल्याङ्कन गर्दा चीन भ्रमणलाई एक मुख्य कारकका रूपमा लिइएको छ। यद्यपि, द न्युयोर्क टाइम्सले हर्मुज जलमार्ग र इरानी बन्दरगाहहरूमा जारी दोहोरो समुद्री प्रतिबन्धले गर्दा कूटनीतिक वातावरण थप चुनौतीपूर्ण बनेको र यसले ट्रम्पको भ्रमणलाई ‘उच्च जोखिमयुक्त’ बनाउन सक्ने औँल्याएको छ।

चीनले मध्यस्थताको इच्छा देखाए पनि वासिङ्टनले इरानी तेलसँग व्यापार गर्ने चिनियाँ कम्पनीहरूमाथि प्रतिबन्ध लगाइरहेकाले दुई देशबीचको तनाव कायमै छ। चीनको ऊर्जा सुरक्षा हर्मुज जलघाँटीमा निर्भर रहेकाले जलमार्गको आंशिक बन्दले विश्वव्यापी आपूर्ति शृङ्खलासँगै अमेरिका–चीन वार्तामा समेत दबाब थपेको छ।

राष्ट्रपति ट्रम्पले ओभल अफिसमा पत्रकारहरूसँग कुरा गर्दै इरानसँग सीमित स्तरमा वार्ता भइरहेको र इरान अहिले सम्झौताको खोजीमा रहेको दाबी गरे। अमेरिकी नाकाबन्दीले इरानी अर्थतन्त्र गम्भीर सङ्कटमा परेकाले उनीहरूमाथि दबाब बढेको उनको ठम्याइ छ।

सैन्य विकल्पका सन्दर्भमा भने ट्रम्पले केही सतर्कता अपनाउनुभएको छ। ठुलो स्तरको आक्रमणको आवश्यकता छ वा छैन भन्नेबारे उनले परिस्थिति र पेन्टागनबाट प्राप्त हुने अद्यावधिक सैन्य विकल्पहरूका आधारमा निर्णय गरिने सङ्केत दिए।

अर्कोतिर, अमेरिकी आन्तरिक राजनीतिमा पनि कानुनी विवाद सुरु भएको छ। सन् १९७३ को युद्ध शक्ति प्रस्तावअन्तर्गतको ६० दिने समयसीमा युद्धविरामका कारण स्थगित हुने प्रशासनको दाबीलाई डेमोक्रेटिक सिनेटरहरूले अस्वीकार गरेका छन्। रक्षामन्त्री पीट हेगसेथले समयसीमा रोकिएको तर्क गरे पनि विपक्षीले यसलाई कानुनी रूपमा त्रुटिपूर्ण बताएका छन्।