काठमाडौँ । काठमाडौँ उपत्यकाका अतिक्रमित तथा नदी किनारका सुकुमवासी बस्ती खाली गराउने सरकारको अभियान अन्तर्गत दोस्रो चरणमा आजदेखि विभिन्न क्षेत्रमा डोजर चलेको छ ।
जिल्ला प्रशासन कार्यालय काठमाडौँले बुधबार नै सूचना निकालेर बस्ती खाली गर्न बिहीबार साँझसम्मको अल्टिमेटम दिएको थियो । प्रशासनको सूचनापछि प्रभावित क्षेत्रका बासिन्दाहरुले धमाधम सामान सारेका थिए । यो क्रम आज बिहानसम्म पनि जारी छ।
आजदेखि टेकुको वंशीघाट, शंखमूल, बुद्धनगर, बल्खु, कुलेश्वर, कपन, वसुन्धारा, गोंगबु, बालाजु, माछापोखरीलगायतको ठाउँमा अतिक्रमित जग्गा खाली गर्ने क्रम चलिरहेको छ ।
यी तस्बिरहरू टेकुको वंशीघाट क्षेत्रका हुन् । यहाँ बिहानसम्मै सामान धमाधम सार्ने क्रम चलिरहेको थियो ।
पहिलो चरणमा सिनामंगलको गैरीगाउँ, शान्तिनगर, मनोहरा र थापाथली क्षेत्रका बस्ती खाली गरिसकिएको छ।
