काठमाडौँ ।  अमेरिकी राष्ट्रपति डोनाल्ड ट्रम्पले इरानसँग जारी युद्ध निर्णायक मोडमा पुगेको दाबी गर्दै आगामी दुईदेखि तीन हप्तासम्म ‘अत्यन्त कडा’ आक्रमण जारी रहने चेतावनी दिएका छन्। ह्वाइट हाउसबाट बुधबार साँझ सम्बोधन गर्दै ट्रम्पले संयुक्त राज्य अमेरिका आफ्नो लक्ष्य हासिल गर्ने चरणमा पुगेको बताए पनि युद्ध कसरी र कहिले टुङ्गिन्छ भन्नेबारे भने कुनै स्पष्ट खाका प्रस्तुत गरेनन्। 

उनले ‘काम छिट्टै पूरा गरिने’ दाबी दोहोर्‍याउँदै अमेरिकी सैन्य कारबाही अझ तीव्र हुने सङ्केत गरे पनि यसले अन्तर्राष्ट्रिय क्षेत्रमा चिन्ता झनै बढाएको छ। एक महिनाभन्दा बढी समयदेखि जारी यस द्वन्द्वले अमेरिकाभित्रै राजनीतिक दबाब बढाइरहेको छ भने बढ्दो तेलको मूल्यका कारण सर्वसाधारणमा आर्थिक भार समेत थपिएको छ।

ट्रम्पले आफ्नो सम्बोधनमा फेब्रुअरी २८ मा सुरु गरिएको आक्रमणमा इजरायलसँगको सहकार्यको बचाउ गर्दै इरानको सैन्य क्षमता कमजोर पार्ने र उसलाई आणविक हतियार प्राप्त गर्नबाट रोक्ने रणनीतिक उद्देश्य रहेको बताएका छन्। द्वन्द्वको सुरुवातमै इजरायलले इरानका सर्वोच्च नेता आयातोल्लाह अली खामेनीको हत्या गरेको घटनालाई उनले आफ्नो ठूलो सफलताका रूपमा प्रस्तुत गर्दै इरानको धेरैजसो नेतृत्व तह समाप्त भइसकेको दाबी गरे। 

यद्यपि, इरानले रणनीतिक रूपमा महत्त्वपूर्ण होर्मुज जलडमरूमध्यमा आफ्नो नियन्त्रण बढाएर जवाफ दिएको छ, जसका कारण विश्व बजारमा पेट्रोलको मूल्य वर्षौंपछि प्रति ग्यालन चार डलर नाघेको छ र सेयर बजारमा समेत गिरावट देखिएको छ।

अमेरिकी सिनेटर क्रिस मर्फीले ट्रम्पको नीतिमा स्पष्टता नभएको र उनले युद्ध विस्तार गरिरहेको भन्दै आलोचना गरेका छन्। यसैबीच ट्रम्पले इरानसँग सम्झौता नभए ऊर्जा पूर्वाधारमा समेत आक्रमण गर्ने र उनीहरूलाई ‘पाषाण युगमा फर्काउने’ कडा चेतावनी दिएका छन्, जसलाई धेरैले अन्तर्राष्ट्रिय कानुनविपरीत र युद्ध अपराधको रूपमा व्याख्या हुन सक्ने चिन्ता व्यक्त गरेका छन्। 

ट्रम्पले इरानी राष्ट्रपति मसुद पेजेस्कियानले युद्धविराम खोजिरहेको दाबी गरे पनि इरानको विदेश मन्त्रालयले त्यसलाई अस्वीकार गर्दै अमेरिकाले ‘अवास्तविक दबाब’ सिर्जना गरेको आरोप लगाएको छ। ट्रम्पले अमेरिकी सैन्य शक्तिमाथि पूर्ण विश्वास व्यक्त गर्दै खाडी क्षेत्रका सहयोगीहरूलाई सुरक्षाको आश्वासन दिएका छन् भने अमेरिकी प्रयासलाई समर्थन नगरेको भन्दै युरोपेली सहयोगीहरूको आलोचना गरेका छन्।