मन्त्रीको लोभ त्यागेर निर्वाचनमा आएको धमलाको दाबी [भिडियो]
हाम्रा कुरा
प्रकाशित २०८२ फागुन १४ बिहिबार
758
Shares
रौतहट । रौतहट क्षेत्र नं ४ बाट आगामी प्रतिनिधि सभा निर्वाचनका लागि उम्मेद्वारी दिएका चर्चित सञ्चारकर्मी ऋषि धमलाले आफू मन्त्री पदको लोभ त्यागेर निर्वाचनको मैदानमा उत्रिएको दाबी गरेका छन् ।
उनले आफ्नो राजनीतिक यात्रा सत्ताका लागि नभई देश परिवर्तनका लागि भएको स्पष्ट पारेका हुन् ।
धमलाका अनुसार, वर्तमान प्रधानमन्त्री सुशीला कार्की र ‘जेन-जी’ आन्दोलनका अगुवाहरूले आफूलाई मन्त्री बन्न बारम्बार आग्रह गरे पनि उनले त्यसलाई अस्वीकार गरेका थिए ।
‘मन्त्री पद मेरा लागि ठूलो कुरा होइन, म सत्ताको लागि होइन, जनताको अवस्था बदल्न राजनीतिमा आएको हुँ’ उनले भने ।
आफूलाई शक्ति र पदको कुनै लालसा नरहेको र केवल विकासका लागि रौतहट आएको उनले बताए।
रौतहटको गरिबी र अशिक्षा हटाउन आफूले सक्रिय भूमिका खेल्ने र देशलाई नयाँ दिशा दिने उनको दाबी छ ।
बिहानदेखि मध्यरातसम्म जनताको घरदैलोमा पुगेर उनीहरूका समस्या सुन्दै आएको उनले बताए ।
उनले प्रभु साह नेतृत्वको आम जनता पार्टीबाट मोबाइल फोन चुनाव चिह्न लिएर चुनावी प्रतिस्पर्धामा होमिएका छन् ।
पत्रकारिता क्षेत्रबाट लामो अनुभव बटुलेका धमलाको रौतहट-४ मा उम्मेद्वारीसँगै यस क्षेत्रको चुनावी माहोल निकै रोचक बनेको छ ।
उनले आफू विजयी भए रौतहटलाई नमुना जिल्ला बनाउने र भ्रष्टाचारमुक्त समाज निर्माण गर्ने प्रतिबद्धता समेत व्यक्त गरेका छन् ।
