सर्लाहीमा मोटरसाइकलको ठक्करबाट वृद्धाको मृत्यु: चालक र सवारी प्रहरी नियन्त्रणमा
हाम्रा कुरा
प्रकाशित २०८२ माघ १७ शनिबार
789
Shares
काठमाडौँ । सर्लाहीको चन्द्रनगर गाउँपालिका–२ बिर्ताटोलमा मोटरसाइकलको ठक्करबाट एक वृद्धाको मृत्यु भएको छ। जिल्ला प्रहरी कार्यालय सर्लाहीका अनुसार शुक्रबार बिहान करिब १० बजे बिर्ताबाट बर्कुरवातर्फ जाँदै गरेको बिआर ३० एपी ३०३७ नम्बरको भारतीय मोटरसाइकलले पैदल यात्री ६५ वर्षीया शान्ती देवी ठाकुरलाई ठक्कर दिएको थियो। मोटरसाइकलको ठक्करबाट उनको टाउको, निधार र ढाडमा गम्भीर चोट लागेको थियो।
दुर्घटनालगत्तै घाइते शान्ती देवीलाई उपचारका लागि बयलवासस्थित अमृत हेल्थ केयरमा लगिएको थियो। त्यहाँ सामान्य उपचारपछि अवस्था गम्भीर देखिएकाले उनलाई थप उपचारका लागि दिउँसो १ बजेतिर वीरगञ्ज पठाइएको थियो। तर, उपचारकै क्रममा हिजै दिउँसो करिब ४ बजे वीरगञ्ज न्यूरो अस्पतालमा उनको ज्यान गएको हो।
प्रहरीले दुर्घटनामा संलग्न मोटरसाइकल र त्यसका चालक चन्द्रनगर गाउँपालिका–३ बर्कुरवा बस्ने २० वर्षीय विशाल महतोलाई नियन्त्रणमा लिएको छ। अहिले उनलाई प्रहरी चौकी मोहनपुरमा राखेर घटनाका सम्बन्धमा थप अनुसन्धान भइरहेको प्रहरीले जानकारी दिएको छ। सवारी चलाउँदा सावधानी नअपनाउँदा यस्ता दुखद घटनाहरू दोहोरिने गरेको भन्दै स्थानीयले चिन्ता व्यक्त गरेका छन्।
