इरान-अमेरिका तनाव चुलिँदै, हिंसात्मक प्रदर्शनलाई लिएर आरोप-प्रत्यारोप
हाम्रा कुरा
प्रकाशित २०८२ माघ १४ बुधबार
2k
Shares
काठमाडौं । इरानका परराष्ट्रमन्त्री सैयद अब्बास अराघचीले हालै देशभर भएका हिंसात्मक प्रदर्शनहरू अमेरिकालाई इरानसँग अर्को युद्धमा तान्ने योजनाबद्ध चाल भएको बताएका छन्। सोमबार श्रीलङ्काका परराष्ट्रमन्त्री विजिथा हेराथसँगको फोन वार्ताका क्रममा उनले यस्तो धारणा राखेका हुन्।
परराष्ट्रमन्त्री अराघचीले यस महिनाको सुरुमा देखिएका 'शान्तिपूर्ण प्रदर्शन' हरू पछि सङ्गठित र आतङ्ककारी प्रकृतिको हिंसामा बदलिएको उल्लेख गरे। उनले यी घटनाहरूको मुख्य उद्देश्य अमेरिकालाई इरानविरुद्धको सैन्य द्वन्द्वमा धकेल्नु रहेको दाबी गरे।
सो क्रममा उनले संयुक्त राष्ट्र मानवअधिकार परिषद्मा इरान विरोधी प्रस्तावको विपक्षमा उभिएर श्रीलङ्काले देखाएको समर्थनको कदर गर्दै त्यसलाई 'स्वतन्त्र र मैत्रीपूर्ण' दृष्टिकोणको संज्ञा दिए।
श्रीलङ्काली परराष्ट्रमन्त्री हेराथले पनि बाह्य हस्तक्षेपका बाबजुद इरानसँगको सम्बन्ध सुदृढ बनाउने प्रतिबद्धता व्यक्त गरे। दुई नेताबीच अर्थतन्त्र, व्यापार र द्विपक्षीय सहयोग विस्तार गर्ने तथा अन्तर्राष्ट्रिय मञ्चहरूमा साझा परामर्श गर्ने सहमति भएको छ।
पछिल्लो डिसेम्बरदेखि इरानमा राष्ट्रिय मुद्राको अवमूल्यन र आर्थिक समस्यालाई लिएर प्रदर्शनहरू सुरु भएका थिए, जुन पछि हिंसात्मक झडपमा परिणत भए। इरानी अधिकारीहरूले यस अस्थिरताका पछाडि अमेरिका र इजरायलको हात रहेको आरोप लगाउँदै आएका छन्। यसैबीच, अमेरिकी राष्ट्रपति डोनाल्ड ट्रम्पले इरानतर्फ 'सैनिक बेडा' पठाइरहेको बताएपछि क्षेत्रमा सैन्य र कूटनीतिक तनाव थप चुलिएको छ।
