छ वर्षपछि बेइजिङ जाँदै बेलायती प्रधानमन्त्री, चिसिएको सम्बन्ध सुधारमा स्टार्मर
हाम्रा कुरा
प्रकाशित २०८२ माघ १३ मंगलबार
1.9k
Shares
काठमाडौँ । बेलायती प्रधानमन्त्री किर स्टार्मर मङ्गलबार राति चीन र जापानको महत्त्वपूर्ण भ्रमणका लागि प्रस्थान गर्दैछन्। सन् २०१८ पछि बेलायती प्रधानमन्त्रीले बेइजिङको आधिकारिक भ्रमण गर्न लागेको यो पहिलो पटक हो। डाउनिङ स्ट्रिटका प्रवक्ताले सोमबार यस भ्रमणको पुष्टि गर्दै यसलाई दुई देशबीचको आर्थिक सम्बन्ध पुन:स्थापित गर्ने अवसरका रूपमा व्याख्या गरेका छन्।
अघिल्लो कन्जर्भेटिभ सरकारको कार्यकालमा लन्डन र बेइजिङबीचको कुटनीतिक सम्बन्ध निकै कमजोर बनेको थियो। प्रधानमन्त्री स्टार्मरको यो भ्रमण मुख्यतः व्यापारिक साझेदारी र लगानीका नयाँ सम्भावनाहरू खोज्नमा केन्द्रित हुनेछ। विशेषगरी ब्रिटिस स्टिलको चिनियाँ स्वामित्व र अन्य आर्थिक मुद्दाहरूमा छलफल हुने अपेक्षा गरिएको छ। रोचक कुरा के छ भने, बेलायती सरकारले लन्डनको केन्द्रमा चीनको 'मेगा-दूतावास' निर्माणका लागि अनुमति दिएको केही दिनमै यो भ्रमणको घोषणा भएको हो। यो दूतावास बेलायतको सबैभन्दा ठूलो कूटनीतिक नियोग हुने बताइएको छ।
आर्थिक सहकार्यको हात बढाए पनि प्रधानमन्त्री स्टार्मरले चीनबाट हुन सक्ने राष्ट्रिय सुरक्षा जोखिमप्रति भने सतर्कता अपनाएका छन्। सुरक्षा मन्त्री डान जार्विसले चीनले सुरक्षा चुनौती खडा गरिरहेको बताएका बेला प्रधानमन्त्रीले सुरक्षा र आर्थिक अवसरबीच सन्तुलन मिलाउनुपर्ने स्वीकार गरेका छन्। बेलायती गुप्तचर एजेन्सीहरूले सम्भावित जोखिम व्यवस्थापनका लागि आवश्यक संयन्त्र विकास गरिसकेको सरकारी प्रवक्ताको भनाइ छ। यो भ्रमणले बेलायतको चीन र जापानसँगको व्यापारिक तथा सुरक्षा सम्बन्धमा नयाँ आयाम थप्ने विश्वास गरिएको छ।
