विश्वकै शक्तिशाली 'आणविक आइसब्रेकर' निर्माण गर्दै रुस
हाम्रा कुरा
प्रकाशित २०८२ माघ ११ आइतबार
2.1k
Shares
काठमाडौँ । रुसी राष्ट्रपति भ्लादिमिर पुटिनले रुसले आणविक ऊर्जाबाट चल्ने बरफ काट्ने जहाज (आइसब्रेकर) निर्माणमा आफ्नो क्षमतालाई विश्वमै अपराजित ढंगले सुदृढ गर्दै लगेको बताएका छन्। आर्कटिक क्षेत्रको अन्वेषणमा रुस दशकौंदेखि अग्रणी रहेको उल्लेख गर्दै उनले आफ्नो आइसब्रेकर बेडाको विस्तारलाई रणनीतिक प्राथमिकतामा राखेको स्पष्ट पारे।
हाल रुससँग ३४ वटा डिजेल र ८ वटा आणविक ऊर्जाबाट चल्ने आइसब्रेकरहरू सञ्चालनमा रहेका छन् भने अन्य धेरै शक्तिशाली जहाजहरू निर्माणाधीन अवस्थामा छन्। राष्ट्रपति पुटिनका अनुसार सुदूर पूर्वको ज्वेज्दा शिपयार्डमा अहिले १५० मेगावाट क्षमताको 'लीडर' नामक विशाल आणविक आइसब्रेकर निर्माण भइरहेको छ। यो जहाज सन् २०३० सम्ममा रुसी बेडामा सामेल हुने अपेक्षा गरिएको छ।
पुटिनले दाबी गरेअनुसार 'लीडर' जहाजले धेरै मिटर बाक्लो बरफलाई बिना कुनै अवरोध निरन्तर काट्न सक्नेछ। यस्तो अत्याधुनिक प्रविधि र शक्ति विश्वको अरू कुनै पनि देशसँग नरहेको भन्दै उनले रुसको प्राविधिक श्रेष्ठताको प्रशंसा गरे। आर्कटिक मार्गलाई वर्षैभरि सुरक्षित र सञ्चालनयोग्य बनाउन यी जहाजहरूले महत्वपूर्ण भूमिका खेल्ने रुसको विश्वास छ।
