काठमाडौँ । बङ्गलादेशमा लामो समयसम्म सत्ता सम्हालेकी शेख हसिनालाई अपदस्थ गर्ने सन् २०२४ को ऐतिहासिक विद्रोहपछि पहिलोपटक हुन लागेको राष्ट्रिय चुनावका लागि आजदेखि औपचारिक प्रचार अभियान सुरु भएको छ। 

हसिनाको बहिर्गमनपछि नोबेल शान्ति पुरस्कार विजेता मुहम्मद युनुसको नेतृत्वमा रहेको अन्तरिम सरकारअन्तर्गत आगामी फेब्रुअरी १२ (माघ २९ गते) मा हुने यो निर्वाचनलाई मुलुकको लोकतान्त्रिक पुनरागमनका लागि निकै महत्त्वपूर्ण मानिएको छ। राजधानी ढाका लगायत देशका विभिन्न भागमा प्रमुख राजनीतिक दलहरूले आजैदेखि र्‍याली र सभाहरूमार्फत आफ्नो चुनावी एजेन्डाहरू जनतामाझ लैजान थालेका छन्।

यसपटकको निर्वाचनमा मतदाताले केवल जनप्रतिनिधि मात्र छान्ने छैनन्, उनीहरूले प्रस्तावित राजनीतिक सुधारसम्बन्धी 'जुलाई राष्ट्रिय चार्टर' बारे हुने जनमतसङ्ग्रहमा समेत भाग लिनेछन्। यो चार्टरले प्रधानमन्त्रीको कार्यकाल सीमा तोक्ने, शक्तिको सन्तुलन मिलाउने र भविष्यमा हुनसक्ने अधिनायकवादी शासनलाई रोक्ने जस्ता कडा प्रावधानहरू समेटेको छ। 

अन्तरिम सरकारले निर्वाचनलाई स्वतन्त्र र निष्पक्ष बनाउने वाचा गरे पनि पूर्व सत्तारूढ अवामी लिगलाई प्रतिबन्ध लगाइएको विषयमा अन्तर्राष्ट्रिय स्तरमा निष्पक्षताको प्रश्न उठेको छ। अवामी लिग र बङ्गलादेश नेसनलिस्ट पार्टी (बिएनपी) ले लामो समयदेखि आलोपालो शासन गर्दै आएकोमा यसपटक एउटा प्रमुख शक्ति मैदानबाहिर हुँदा चुनावी समीकरण फेरिएको छ।

यसैबीच, बिएनपीका अध्यक्ष तथा पूर्वप्रधानमन्त्री खालिदा जियाका छोरा तारिक रहमानलाई भावी प्रधानमन्त्रीको प्रमुख दावेदारका रूपमा हेरिएको छ। १७ वर्षको निर्वासनपछि गत डिसेम्बरमा स्वदेश फर्किका रहमानले आजै उत्तरपश्चिमी सहर सिल्हटबाट आफ्नो चुनावी अभियानको औपचारिक सुरुवात गरेका छन्। 

अवामी लिग बाहिरिएपछि इस्लामवादी दल 'जमात–ए–इस्लामी' को नेतृत्वमा रहेको १० दलीय गठबन्धनले पनि आफ्नो प्रभाव विस्तार गर्ने प्रयास गरिरहेको छ, जसमा विद्रोहको नेतृत्व गर्ने विद्यार्थी नेताहरूको नयाँ दल 'नेसनल सिटिजन पार्टी' (एनसिपी) समेत सहभागी छ। निर्वाचन आयोगले यसपटक विदेशमा रहेका प्रवासी नागरिकलाई पनि मतदानको अधिकार दिएको छ र उम्मेदवार चित्त नबुझेमा 'नो भोट' को विकल्प समेत पुनः उपलब्ध गराएको छ।