चुनावी मैदानमा माधव नेपालको 'क्लिन चिट': उजुरी खारेज भएपछि रौतहट १ मा प्रतिस्पर्धा निश्चित
हाम्रा कुरा
प्रकाशित २०८२ माघ ८ बिहिबार
1k
Shares
काठमाडौँ । आगामी फागुन २१ गते हुने प्रतिनिधि सभा निर्वाचनका लागि रौतहट क्षेत्र नं. १ बाट उम्मेदवारी दिएका पूर्वप्रधानमन्त्री एवं नेपाली कम्युनिष्ट पार्टीका सह-संयोजक माधवकुमार नेपाल विरुद्धको उजुरी दरपीठ (दर्ता नगरी खारेज) भएको छ। मुख्य निर्वाचन अधिकृतको कार्यालयले पर्याप्त कानुनी आधार र प्रमाणको अभाव देखाउँदै सो उजुरीलाई तामेलीमा राख्ने निर्णय गरेको हो।
यसअघि सोही निर्वाचन क्षेत्रका अर्का उम्मेदवार रामनरेश राय यादवले नेपाल विरुद्ध दाबी-विरोध पेस गरेका थिए। उजुरीमा विशेषगरी पतञ्जली योगपीठको जग्गा खरिद-बिक्री प्रकरणमा भ्रष्टाचारको मुद्दा विशेष अदालतमा विचाराधीन रहेको र उनी निलम्बनमा रहनुपर्ने अवस्थाका व्यक्ति भएको दाबी गरिएको थियो। यादवले प्रतिनिधिसभा सदस्य निर्वाचन ऐन, २०७४ र भ्रष्टाचार निवारण ऐनका विभिन्न दफाहरू उद्धृत गर्दै नेपाललाई उम्मेदवार बन्न अयोग्य ठहर गर्न माग गरेका थिए।
यद्यपि, मुख्य निर्वाचन अधिकृतको कार्यालयले गरेको प्रारम्भिक जाँचबुझमा उजुरीकर्ताले लगाएका आरोपहरूलाई पुष्टि गर्ने ठोस र आधिकारिक प्रमाणहरू निवेदनसँगै संलग्न नरहेको पाइएको छ। कार्यालयका अनुसार हालको कानुनी स्थिति र प्राप्त कागजातका आधारमा उम्मेदवारी बदर गरिहाल्नुपर्ने कुनै बलियो आधार नदेखिएकाले उक्त निवेदनलाई दरपीठ गरिएको हो। निर्वाचन अधिकृतको यो निर्णयसँगै माधवकुमार नेपालको उम्मेदवारी कानुनी रूपमा यथावत कायम भएको छ र उनलाई चुनावी प्रतिस्पर्धामा उत्रिन बाटो खुला भएको छ।
