विशेष महाधिवेशनको उद्घाटन कार्यक्रम जारी, यस्तो देखियो ड्रोनबाट महाधिवेशनस्थल [तस्बिर]
हाम्रा कुरा
प्रकाशित २०८२ पुष २७ आइतबार
981
Shares
काठमाडौँ । नेपाली कांग्रेसको दोस्रो विशेष महाधिवेशन चलिरहेको छ । दिउँसो उद्घाटन सत्र चलिरहेको छ । महाधिवेशन प्रतिनिधिहरू सबै जिल्लाबाट आएका छन् । उपत्यकाका विभिन्न छ स्थानबाट बिहान निस्केको जुलुस कार्यक्रम स्थल भृकुटीमण्डपमा आएसँगै उद्घाटन सत्र चलिरहेको हो ।
महामन्त्रीद्धय गगनकुमार थापा र विश्वप्रकाश शर्माले दीप प्रज्वलन र बिरुवामा पानी हालेर संयुक्त रुपमा दोस्रो विशेष महाधिवेशनको उद्घाटन गरे ।
त्यससँगै नेताहरुबाट विचार राख्ने क्रम चलिरहेको छ । त्यस्तै सांस्कृतिक समूहबाट कांग्रेसलाई जागरुक गराउने गीतहरुसमेत प्रस्तुत भइरहेका छन् ।
विशेष महाधिवेशनमा ६० प्रतिशत महाधिवेशन प्रतिनिधि सहभागी हुने दाबी गरिएको छ ।
गत असोज २९ गते ५४.५८ प्रतिशत महाधिवेशन प्रतिनिधिले विशेष महाधिवेशन माग गरेका थिए । कांग्रेसको विधानको १७ (२) अनुसार ४० प्रतिशत महाधिवेशन प्रतिनिधिले विशेष महाधिवेशन माग गरेको तीन महिनाभित्र विशेष महाधिवेशन आह्वान गर्नुपर्ने हुन्छ ।
संस्थापनको बेवास्तापछि सोही विधानको दफालाई टेकेर कांग्रेसलाई पुनःजागरण गर्न महामन्त्रीद्धय गगनकुमार थापा र विश्वप्रकाश शर्माको अगुवाइमा दुई दिने विशेष महाधिवेशन आजदेखि भइरहेको हो ।
उक्त भृकुटीमण्डपस्थलमा देखिएको कांग्रेसको विशेष महाधिवेशन ड्रोनबाट यस्तो देखिएको छ ।
