खाडीका दुई शक्तिबीच खटपट: यमनी पृथकतावादी नेता भगाएको साउदीको आरोपले सम्बन्धमा दरार
हाम्रा कुरा
प्रकाशित २०८२ पुष २४ बिहिबार
2.1k
Shares
काठमाडौँ । यमन युद्धमा लामो समयदेखि काँधमा काँध मिलाएर लड्दै आएका साउदी अरेबिया र संयुक्त अरब इमिरेट्स (युएई) बीचको सम्बन्धमा गम्भीर दरार उत्पन्न भएको छ। साउदी अरेबियाले यमनमा देशद्रोहको आरोप खेपिरहेका पृथकतावादी नेता ऐदारस अल-जुबैदीलाई युएईले गोप्य रूपमा भगाएर अबुधाबी पुर्याएको गम्भीर आरोप लगाएपछि यी दुई छिमेकी राष्ट्रबीच तनाव चुलिएको हो।
यसरी भगाइएका थिए जुबैदी साउदी सेनाका प्रवक्ता मेजर जनरल तुर्की अल-मल्कीले बिहीबार जारी गरेको विज्ञप्तिअनुसार, 'दक्षिणी ट्रान्जिसनल काउन्सिल' का नेता जुबैदी सुरुमा डुङ्गामार्फत यमनबाट सोमालिया पुगेका थिए। त्यहाँबाट उनलाई युएईका एक मेजर जनरलको प्रत्यक्ष संलग्नतामा इल्युसिन इल-७६ विमानमार्फत अबुधाबी लगिएको साउदीको दाबी छ। साउदीले युएईमाथि द्वन्द्वग्रस्त क्षेत्रमा हतियार आपूर्ति गर्ने गरेको पुरानो आरोपलाई पनि यसै सन्दर्भमा पुनः उठाएको छ।
पहिलेका साझेदार, अहिलेका प्रतिद्वन्द्वी दक्षिणी यमनमा प्रभाव जमाउन खोजिरहेको एसटीसीलाई युएईको बलियो समर्थन रहँदै आएको छ। सन् २०२२ देखि राष्ट्रपति नेतृत्व परिषद्को हिस्सा रहेका जुबैदीलाई साउदीमा वार्ताका लागि जान अस्वीकार गरेपछि यसै साता पदबाट हटाइएको थियो र उनीमाथि देशद्रोहको मुद्दा चलाइएको थियो। साउदीको यो कडा कदमले यमनको राजनीतिमा आफ्नो नियन्त्रण कायम राख्ने उसको चाहनालाई प्रष्ट पारेको छ।
यमनमा वर्षौंदेखि जारी युद्धले १ लाख ५० हजारभन्दा बढीको ज्यान लिइसकेको छ र यसले विश्वकै भयावह मानवीय सङ्कट निम्त्याएको छ। लाल सागरमा हुथी विद्रोहीहरूको बढ्दो आक्रमणले विश्व व्यापारमै असर पुर्याइरहेका बेला साउदी र युएईबीचको यो आन्तरिक द्वन्द्वले क्षेत्रीय सुरक्षामा थप चुनौती थपेको विश्लेषकहरू बताउँछन्। हालसम्म युएईले यसबारे कुनै औपचारिक प्रतिक्रिया दिएको छैन, तर दुई देशबीचको बढ्दो आर्थिक र क्षेत्रीय प्रतिस्पर्धाले यो विवाद अझै लम्बिने सङ्केत देखाएको छ।
