चलचित्र विधेयक र कोशी प्रदेश अनुगमनको समीक्षा गर्न जुट्दै समितिहरू
हाम्रा कुरा
प्रकाशित २०८२ पुष २२ मंगलबार
628
Shares
काठमाडौँ । राष्ट्रिय सभाअन्तर्गतका दुई महत्वपूर्ण विषयगत समितिको बैठक आज बस्दैछ। संघीय संसद् सचिवालयका अनुसार आजको बैठकमा कानुन निर्माण र प्रदेशस्तरीय अनुगमनका विषयमा केन्द्रित रहेर छलफल हुने कार्यतालिका रहेको छ।
बिहान साढे ११ बजे बस्ने विधायन व्यवस्थापन समितिको बैठकमा 'चलचित्र विधेयक, २०८१' माथि दफावार छलफल हुनेछ। चलचित्र क्षेत्रलाई व्यवस्थित र मर्यादित बनाउन ल्याइएको यस विधेयकका प्रावधानहरूमाथि सदस्यहरूबीच गहन छलफल गरी निष्कर्ष निकालिने बताइएको छ।
त्यसैगरी, दिउँसो १ बजे सार्वजनिक नीति तथा प्रत्यायोजित विधायन समितिको बैठक बस्नेछ। उक्त बैठकमा समितिको तर्फबाट कोशी प्रदेशमा गरिएको अनुगमन कार्यक्रमको समीक्षा गरिनेछ। अनुगमनका क्रममा देखिएका समस्या, कार्यान्वयनको अवस्था र आगामी कार्यदिशाबारे बैठकमा सदस्यहरूले आफ्नो धारणा राख्नेछन्।
