काठमाडौँ । अमेरिकी राष्ट्रपति डोनाल्ड ट्रम्पले सिरियासहित थप सात देशका नागरिक र प्यालेस्टिनी प्राधिकरणका पासपोर्ट वाहकहरूलाई संयुक्त राज्य अमेरिका प्रवेशमा पूर्ण यात्रा प्रतिबन्ध लगाउने निर्णय गरेका छन्।

यस कदमसँगै राष्ट्रियताको आधारमा मात्र अमेरिका प्रवेशमा रोक लगाइएका देशहरूको सङ्ख्या करिब ४० पुगेको छ भने पश्चिमी देशहरूबाट हुने नियमित यात्रामा समेत नियमहरू थप कडा पारिएका छन्।

आप्रवासनप्रति कठोर दृष्टिकोणलाई आफ्नो प्रमुख राजनीतिक एजेन्डा बनाउँदै आएका राष्ट्रपति ट्रम्पले सामूहिक निर्वासनको आदेश जारी गरिसकेका छन् र गैर–श्वेत आप्रवासीहरूविरुद्धको कडा अभिव्यक्ति पनि तीव्र बन्दै गएको छ।

ह्वाइट हाउसले जारी गरेको विज्ञप्तिमा अमेरिकीहरूलाई धम्की दिन सक्ने विदेशी नागरिकहरूलाई रोक्न र अमेरिकाको संस्कृति, सरकार, संस्था तथा संस्थापक सिद्धान्तहरूलाई कमजोर पार्न खोज्ने व्यक्तिहरूलाई देशभित्र प्रवेश नदिन यो प्रतिबन्ध लगाइएको उल्लेख गरिएको छ।

लामो समयसम्म शासक बशर अल–असदको पतनपछि अन्तर्राष्ट्रिय समुदायमा पुनःस्थापना हुने प्रयासमा रहेको सिरियामाथि यो प्रतिबन्ध त्यतिबेला लगाइएको छ जतिबेला केही दिनअघि त्यहाँ दुई अमेरिकी सैनिक र एक सर्वसाधारण मारिएका थिए। यता फ्रान्स र बेलायतलगायत केही पश्चिमी देशहरूले प्यालेस्टिनी राज्यलाई मान्यता दिएको विरोधमा ट्रम्प प्रशासनले इजरायलसँग ऐक्यबद्ध हुँदै प्यालेस्टिनी प्राधिकरणका पासपोर्ट वाहकहरूमाथि पहिलेदेखि नै लगाउँदै आएको अनौपचारिक यात्रा प्रतिबन्धलाई अहिले औपचारिक बनाएको छ।

पूर्ण यात्रा प्रतिबन्धमा परेका नयाँ देशहरूमा अफ्रिकाका बुर्किना फासो, माली, नाइजर, सिएरा लियोन र दक्षिण सुडानका साथै दक्षिणपूर्वी एसियाको लाओस रहेका छन्। यसबाहेक नाइजेरिया, आइभोरी कोस्ट र सेनेगललगायत केही अफ्रिकी देशका नागरिकमाथि आंशिक यात्रा प्रतिबन्ध लगाइएको छ, जसले गर्दा आगामी विश्वकप फुटबलमा ती देशका खेलाडीले प्रवेश पाए पनि प्रशंसकहरूका हकमा भने कुनै सुनिश्चितता गरिएको छैन।

आंशिक प्रतिबन्धमा परेका अन्य देशहरूमा एङ्गोला, एन्टिगुआ र बार्बुडा, बेनिन, डोमिनिका, ग्याबोन, गाम्बिया, मलावी, मौरितानिया, तान्जानिया, जाम्बिया, जिम्बाब्वे तथा टोङ्गा रहेका छन्, जसमध्ये केही देश अमेरिकाका महत्त्वपूर्ण साझेदार समेत मानिन्छन्। शरणार्थी अधिकारका पक्षमा काम गर्ने संस्था ग्लोबल रिफ्युजले यो नीतिले कमजोर र जोखिममा परेका मानिसहरूलाई झनै अप्ठ्यारो अवस्थामा धकेल्ने र व्यक्तिगत मूल्याङ्कनको सट्टा सम्पूर्ण जनसङ्ख्यालाई सजाय दिने काम भएको भन्दै चेतावनी दिएको छ।

राष्ट्रपति ट्रम्पले पछिल्ला कार्यक्रममा आप्रवासीहरूलाई लक्षित गर्दै विवादास्पद भाषा प्रयोग गरिरहेका छन् भने यसअघि नै सोमालिया, अफगानिस्तान, इरान, लिबिया, सुडान र यमन जस्ता देशहरू पूर्ण प्रतिबन्धको सूचीमा रहेका थिए। यद्यपि ह्वाइट हाउसले तुर्कमेनिस्तानले गरेको महत्वपूर्ण प्रगतिलाई स्वीकार गर्दै त्यहाँका नागरिकलाई गैर–आप्रवासी भिसामा पुनः प्रवेश अनुमति दिन थालिएको जनाए पनि समग्रमा अमेरिकी आप्रवासन नीति निकै कठोर बनेको देखिन्छ।