उदयपुर। उदयपुरको चौदण्डीगढी नगरपालिका–१०, हँडिया क्षेत्रमा जङ्गली हात्तीले गाउँ पसेर उपद्रो मच्चाएको छ। दैनिक रातिका समयमा हात्ती गाउँ प्रवेश गरेर घरमा थन्क्याएका खाद्यन्न तथा बालीमा नास गर्न थालेकाले स्थानीयवासीले गुनासो गरेका छन्।
स्थानीयवासी श्यामनारायण चौधरीका अनुसार गत शनिबार रातिमात्र स्थानीय अमृत अधिकारीको घरका बार भत्काएर अन्न क्षति गरेको थियो। यसैगरी, स्थानीय पर्शुराम हुजदारको घरको भकारीमा राखेको धान पनि हात्तीले क्षति गरेको छ। मध्यरातमा हात्ती प्रवेश गरेर घर वरिपरिका बिरुवा खाने र भकारी भत्काएर धान खान थालेको हुजदारले बताए।
हात्ती रातिका समयमा गाउँमा प्रवेश गर्न थालेपछि स्थानीयवासी सीताराम चौधरीका अनुसार कतिपय गाउँले रातभरि आगो बालेर हात्ती धपाउन जाग्राम नै बस्नुपरेको छ। स्थानीयहरू चिसो बढेसँगै हात्ती गाउँ प्रवेश गरेर बिगार तथा उपद्रो गर्न थालेको बताउँछन्।
