२०२६ का लागि सक्रिय वित्तीय नीति र ‘मध्यम खुकुलो’ मौद्रिक नीति, नवप्रवर्तनमा जोड
हाम्रा कुरा
प्रकाशित २०८२ मंसिर २६ शुक्रबार
1.8k
Shares
काठमाडौँ। चीनले सन् २०२६ का लागि आर्थिक लक्ष्य र नीति निर्धारण गर्न वार्षिक केन्द्रीय आर्थिक कार्य सम्मेलन बुधबार र बिहीबार बेइजिङमा सम्पन्न गरेको छ। सम्मेलनमा चिनियाँ राष्ट्रपति सी चिनफिङले सन् २०२५ को आर्थिक कामको समीक्षा गर्दै वर्तमान आर्थिक अवस्थाको विश्लेषण गरेका थिए र आगामी वर्षका लागि कार्यदिशा प्रस्तुत गरे।
सम्मेलनले सन् २०२५ लाई ‘असाधारण उपलब्धिको वर्ष’ भन्दै आर्थिक तथा सामाजिक विकासका प्रमुख लक्ष्यहरू सफलतापूर्वक हासिल हुने निष्कर्ष निकालेको छ। १४औँ पञ्चवर्षीय योजना (२०२१–२०२५) अन्तिम चरणमा पुगेको उल्लेख गर्दै बैठकले चीनले विविध चुनौतीहरू पार गर्दै महत्त्वपूर्ण उपलब्धि हासिल गरेको जनायो।
बैठकले सुधार, नवप्रवर्तन र आन्तरिक क्षमतामा जोड दिँदै आर्थिक सम्भावनालाई प्रभावकारी रूपमा उपयोग गर्नुपर्नेमा जोड दियो, साथै बजार गतिशीलता र सरकारी नियमन दुवैलाई सन्तुलित रूपमा अघि बढाउने आवश्यकतामा बल दिइयो। चीनले आगामी वर्ष सक्रिय वित्तीय नीति लागू गर्ने, आवश्यक सरकारी खर्च र ऋण स्तर व्यवस्थित गर्ने, कर तथा अनुदान प्रणाली सुधार गर्ने र स्थानीय सरकारका वित्तीय चुनौतीहरूको समाधानमा ध्यान दिने योजना बनाएको छ।
मौद्रिक नीतिमा चीनले मध्यम रूपमा खुकुलो नीति कायम राख्ने, ब्याजदर र आरक्षित अनुपात जस्ता उपकरण लचिलो रूपमा प्रयोग गर्ने र घरेलु माग, प्रविधि–नवाचार तथा साना तथा मध्यम उद्योगमा बैंकिङ समर्थन बढाउने जनाएको छ। सम्मेलनले रोजगारी, व्यवसाय र बजारमा स्थिरता कायम राख्दै सामाजिक अपेक्षालाई मजबुत बनाउने तथा यसै आधारमा १५औँ पञ्चवर्षीय योजना (सन् २०२६–२०३०) लाई सशक्त सुरुआत दिने लक्ष्य राखेको छ।
