काठमाडौँ। अमेरिकी सांसदहरूले कुख्यात करोडपति यौन शिकारी जेफ्री एपस्टेनसँग सम्बन्धित सरकारी रेकर्ड सार्वजनिक गर्न बाध्य पार्ने 'एपस्टेन फाइल ट्रान्सपरेन्सी एक्ट' विधेयक अगाडि बढाउने तयारी गरेका छन्। यो कदम राष्ट्रपति डोनाल्ड ट्रम्पले आधुनिक अमेरिकाको सबैभन्दा विवादास्पद केस फाइलहरूमध्ये एकलाई ढाकछोप राख्ने प्रयासलाई अस्वीकार गर्दै नयाँ मोडमा पुगेको छ।

हप्तौँसम्म चलेको प्रतिरोध र चर्को लबिङका बाबजुद राष्ट्रपति ट्रम्पले आइतबार आफ्नो अडान फिर्ता लिई हाउस रिपब्लिकनहरूलाई फाइल सार्वजनिक गर्न मतदान गर्नुपर्ने बताउन बाध्य भएका थिए। करिब १०० भन्दा बढी रिपब्लिकन सांसदहरू नै ट्रम्पको आग्रहविपरीत फाइल सार्वजनिक गर्न तयार भएपछि परिस्थितिले उनको पक्ष कमजोर बनाएको थियो।

अब प्रतिनिधि सभाले एपस्टेन सम्बन्धी अपरेशन, उनको गतिविधि र सन् २०१९ मा हिरासतमा भएको मृत्युसम्बन्धी सरकारी कागजातहरूको अवर्गीकृत विवरण सार्वजनिक गराउने यो विधेयक पारित गर्ने लगभग निश्चित देखिएको छ। सांसदहरूका अनुसार एक हजारभन्दा बढी सम्भावित पीडितहरूको मुद्दामा जनतालाई सत्य बुझ्ने पूर्ण हक छ। ट्रम्प समर्थक कार्यकर्ताहरूले पनि यो कागजातले डेमोक्रेट तथा अन्य उच्च तहका व्यक्तिहरू लामो समयदेखि जाँचबाट जोगिएको दाबी पुष्टि गर्न मद्दत गर्ने विश्वास व्यक्त गरेका छन्।

राष्ट्रपति ट्रम्पले विधेयकको मार्ग अवरुद्ध गर्न सक्ने भए पनि मध्यावधि निर्वाचन नजिकिँदै गर्दा जनभावना पारदर्शिताको पक्षमा खुलेर उभिएको अवस्थामा यस्तो कदम राजनीतिक रूपमा जोखिमपूर्ण हुने आकलन गरिएको छ।

यस प्रकरणले रिपब्लिकन नेतृत्वभित्र दुर्लभ दरार पनि उजागर गरेको छ। सुरूमा फाइल सार्वजनिक गर्न उत्साहित देखिनुभएका नेता माइक जोनसन पदभार सम्हाल्नेबित्तिकै पछि हटेका थिए।

सदनमा सबै डेमोक्रेट तथा चार रिपब्लिकन सांसदले ‘डिस्चार्ज पिटिशन’ मा हस्ताक्षर गरी मतदान प्रक्रियालाई बाध्यतापूर्वक अघि बढाएका थिए। ट्रम्पले आइतबार ट्रुथ सोसलमार्फत आफ्नो अडान फिर्ता लिँदै "किनकि हामीसँग लुकाउन केही छैन" भन्दै रिपब्लिकनहरूलाई मतदान गर्नुपर्ने बताएका थिए।

यदि विधेयक प्रतिनिधि सभाबाट पारित भएमा डेमोक्रेटहरूले रिपब्लिकनहरूलाई सिनेटमा तत्काल प्रक्रिया अघि बढाउन कडा दबाब दिने तयारी गरेका छन्।