मोरङ । कोशी प्रदेश सरकारले मोरङ कटहरी गाउँपालिका वडा नं १ को तरकारी बजारमा रहेको संरचनामा प्रदेशसभा सार्ने निर्णयले स्थानीयवासी उत्साहित भएका छन् ।
गत भदौ २३ र २४ को जेन-जी आन्दोलनका क्रममा विराटनगरमा रहेको प्रदेशसभा भवन आगजनीबाट क्षतिग्रस्त भएपछि प्रदेशसभा बैठक बस्न सकेको थिएन ।
कटहरीमा प्रदेशसभा सार्ने निर्णयसँगै प्रदेशसभा सचिवालय स्थापनाको काम शुरू गरिएको छ ।
सो निर्णयले स्थानीयवासी उत्साहित भएको वडाध्यक्ष हरिनारायण राजवंशीले जानकारी दिए ।
उनले भने, “सर्वदलीय बैठक र गाउँ कार्यपालिका बैठकबाट निर्णय गरी निःशुल्क रूपमा प्रदेशसभाका लागि साढे तीन विघा क्षेत्रफलमा रहेको १६ करोडको संरचना उपलब्ध गराएका छौँ ।”
उनका अनुसार जग्गा धनीपूर्जा पनि प्रदेश सरकारलाई हस्तान्तरण गरिएको छ । रासस
