काठमाडौँ। शुक्रवार गरिएको पछिल्लो ब्यालेस्टिक क्षेप्यास्त्र प्रक्षेपणपछि अमेरिकालगायत दक्षिण कोरियाले आलोचना गरेपछि उत्तर कोरियाले शनिबार थप ‘आक्रामक कारबाही’ गर्ने चेतावनी दिएको छ। यो मिसाइल परीक्षण अमेरिकी राष्ट्रपति डोनाल्ड ट्रम्पको पूर्वी एसियाली भ्रमणको बीचमा भएको हो, यद्यपि ट्रम्पले उत्तर कोरियाली नेता किम जोङ उनसँग भेट गर्ने इच्छा व्यक्त गरेको एक हप्तापछि पनि प्योङयाङले उक्त प्रस्तावमा कुनै प्रतिक्रिया जनाएको छैन।

प्योङयाङका रक्षामन्त्री नो क्वाङ चोलले वासिङ्टनलाई 'उत्तर कोरियाको सुरक्षालाई गम्भीर जोखिममा पार्ने सैन्य गतिविधिमा निर्लज्ज रूपमा संलग्न भएको' आरोप लगाए। उनले अमेरिकी र दक्षिण कोरियाली कदमहरूले ‘जानाजानी क्षेत्रीय राजनीतिक र सैन्य तनावलाई बढाइरहेको’ बताउँदै कोरियन सेन्ट्रल न्युज एजेन्सी (केसीएनए) मार्फत “हामी शत्रुहरूको निरन्तर खतरा विरुद्ध अझ आक्रामक कारबाहीका कदमहरू देखाउनेछौँ” भन्ने भनाइ सार्वजनिक गरे।

यसअघि अमेरिकी रक्षामन्त्री पिट हेग्सेथ र उहाँका दक्षिण कोरियाली समकक्षले डिमिलिटाराइज्ड जोन (डिएमजेड) को संयुक्त भ्रमण गर्नुभएको थियो, जहाँ उहाँहरूले आफ्नो देशबीचको ‘बलियो संयुक्त रक्षा प्रतिबद्धता र घनिष्ठ सहयोग’ पुनः पुष्टि गर्नुभएको थियो। यसैबीच, अमेरिकी आणविक–सञ्चालित विमानवाहक युएसएस जर्ज वासिङ्टन पनि बुसान बन्दरगाहमा पुगेको थियो, जसलाई प्योङयाङले ‘कोरियाली प्रायद्वीपमा तनाव थप बढाउने कार्य’ भएको भन्दै आपत्ति जनाएको छ।

अमेरिकी इन्डो–प्यासिफिक कमान्डले शुक्रवारको क्षेप्यास्त्र प्रक्षेपणको प्रतिक्रिया दिँदै प्योङयाङको कार्यले ‘क्षेत्रीय स्थिरतामा गम्भीर असर पार्ने’ बताएको छ भने दक्षिण कोरियाली सेनाले समेत पछिल्लो क्षेप्यास्त्र प्रक्षेपणको कडा निन्दा गर्दै ‘दुई कोरियाबीचको तनाव बढाउने सबै कार्यहरू तुरुन्तै रोक्न’ आग्रह गरेको छ।

गत हप्ता राष्ट्रपति ट्रम्पले दक्षिण कोरियालाई आणविक पनडुब्बी निर्माण गर्ने योजनामा स्वीकृति प्रदान गरेको घोषणा गर्नुभएको थियो, जसले उत्तर कोरियाबाट कठोर र आक्रामक प्रतिक्रिया आउने सम्भावना बढाएको विश्लेषकहरू बताउँछन्। यसैबीच, दक्षिण कोरियाली सांसदहरूले देशको रक्षा गुप्तचर एजेन्सीले उत्तर कोरियाली नेता किम जोङ उनले निर्णय गरेमा प्योङयाङ आफ्नो सातौँ आणविक परीक्षण गर्न ‘पूर्ण रूपमा तयार अवस्थामा रहेको’ जानकारी दिएको बताएका छन्।