काठमाडौँ। अमेरिकी राष्ट्रपति डोनाल्ड ट्रम्पले भेनेजुएलाभित्र लागुऔषध तस्करी नियन्त्रण गर्नका लागि अमेरिकी सैन्य आक्रमण गर्ने कुनै पनि योजनालाई स्पष्ट रूपमा अस्वीकार गरेका छन्। भेनेजुएलामा कोकेन उत्पादन केन्द्र र तस्करी मार्गहरूलाई लक्षित गर्ने अमेरिकी योजना तयार भइरहेको भन्ने रिपोर्टहरू सार्वजनिक भएपछि उनको यो अभिव्यक्ति आएको हो। पत्रकारहरूले रिपोर्टहरू सत्य हुन् कि होइनन् भनी सोधेको प्रश्नमा राष्ट्रपति ट्रम्पले संक्षेपमा "होइन, यो सत्य होइन" भन्दै जवाफ दिए।

राष्ट्रपति ट्रम्पको यो भनाइ युएसएस जेराल्ड आर फोर्ड नामक अत्याधुनिक विमानवाहक समूहलाई गत हप्ता अमेरिकी युद्धमन्त्री पिट हेगसेथले युरोपबाट क्यारिबियन क्षेत्रतर्फ सर्न आदेश दिएपछि आएको हो, जसले गर्दा अमेरिकी सैन्य गतिविधि भेनेजुएलासँग सम्बन्धित हुनसक्ने अड्कलहरू बढेका थिए। यसअघि सिनेटर लिन्डसे ग्राहमले पनि भेनेजुएलामाथि सम्भावित भूमि आक्रमणलाई ‘वास्तविक विकल्प’ भन्दै चेतावनी दिएका थिए र वासिङ्टनले नार्को–तस्करी सञ्जालहरू विरुद्धको अभियानलाई सशक्त बनाउन खोजेको बताएका थिए।

यसैबीच, अमेरिकाले पछिल्ला हप्ताहरूमा क्यारिबियन र प्रशान्त क्षेत्रका समुद्री मार्गहरूमा लागुऔषध तस्करीमा संलग्न भनिएका डुङ्गाहरूमा हवाई आक्रमणलाई निरन्तरता दिइरहेको छ। बुधबार मात्रै पूर्वी प्रशान्त क्षेत्रमा भएको पछिल्लो हवाई आक्रमणमा लागुऔषध बोकिरहेको एउटा डुङ्गा लक्षित गरिएको र जसमा चार व्यक्तिको मृत्यु भएको युद्धमन्त्री हेगसेथले जानकारी दिए। सेप्टेम्बरको सुरुदेखि यो १४औँ हवाई प्रहार हो, जसबाट अहिलेसम्म कम्तीमा ६१ जनाको मृत्यु भइसकेको छ।

यस घटनाक्रमप्रति संयुक्त राष्ट्रसङ्घले गम्भीर चासो व्यक्त गरेको छ। संयुक्त राष्ट्रसङ्घका मानव अधिकारका लागि उच्चायुक्त भोल्कर टर्कले सेप्टेम्बरको सुरुदेखि क्यारिबियन र प्रशान्त क्षेत्रमा अमेरिकी सशस्त्र बलले गरेको निरन्तर हवाई आक्रमणमा ६० जनाभन्दा बढी व्यक्तिको मृत्यु भएको र यसका लागि अन्तर्राष्ट्रिय कानूनमा कुनै स्पष्ट औचित्य नदेखिएको बताए। उनले अमेरिकाले तुरुन्तै यी आक्रमणहरू रोक्नुपर्ने र ती डुङ्गाहरूमा रहेका मानिसहरूको गैरन्यायिक हत्या रोक्नका लागि आवश्यक सबै उपायहरू अवलम्बन गर्नुपर्ने बताएका छन्।

राष्ट्रपति ट्रम्पको भेनेजुएला आक्रमण अस्वीकार सम्बन्धी अभिव्यक्तिलाई राजनीतिक विश्लेषकहरूले अमेरिकाको क्षेत्रीय रणनीतिमा सावधानीपूर्वक सन्तुलन कायम गर्न खोजेको सङ्केतका रूपमा व्याख्या गरेका छन्।