काठमाडौँ। संघीय राजधानी काठमाडौँमा जेन–जी युवाहरूको गतिविधि बढ्न थालेपछि सुरक्षा व्यवस्था मजबुत बनाइएको छ।
जेन–जी पुस्ताका युवाहरूले संवैधानिक आयोगका पदाधिकारीहरूको नियुक्ति खारेजी र 'जेन–जी विद्रोह' मा दमनकारी भूमिका खेलेका शीर्ष नेताहरूलाई पक्राउ गर्न चौतर्फी दबाब बढाएपछि काठमाडौँका मुख्य सार्वजनिकस्थल तथा सरकारी कार्यालयहरूमा सुरक्षाकर्मीको तैनाथी बढाइएको हो।
युवाहरूले सामाजिक सञ्जालमार्फत तत्कालीन प्रधानमन्त्री केपी शर्मा ओली र तत्कालीन गृहमन्त्री रमेश लेखकलाई पक्राउ गर्न दबाब दिइरहेका छन्। यसै क्रममा जेन–जीको एक समूहले आज (मंगलबार) बिहान अख्तियार दुरुपयोग अनुसन्धान आयोग (अदुअआ) का प्रमुख आयुक्त प्रेमकुमार राई र सबै आयुक्तहरूको राजीनामाको माग गर्दै औपचारिक रूपमा निवेदन समेत दर्ता गराएको छ।
ओली र लेखकलाई पक्राउ गर्ने विषयमा सोमवार साँझ प्रधानमन्त्री सुशीला कार्कीले सबै सुरक्षा अंगका प्रमुखहरूसँग छलफल गर्नुभएको थियो। यद्यपि, प्रहरीले भने लिखित जवाफ माग गर्दै जाहेरी लिन नमानेको बताइएको छ।
