इरान र रुसबीच साना मोड्युलर रिएक्टर निर्माणका लागि समझदारी
हाम्रा कुरा
प्रकाशित २०८२ असोज १० शुक्रबार
2.4k
Shares
काठमाडौं। इरान र रुसले बुधबार इरानमा साना मोड्युलर रिएक्टर निर्माणका लागि समझदारी पत्रमा हस्ताक्षर गरेका छन्। यस समझदारीले दुई देशबीच आणविक ऊर्जाको शान्तिपूर्ण प्रयोग, दिगो विकास, ऊर्जा सुरक्षा, र उन्नत प्रविधिको सुदृढीकरण लाई प्रोत्साहित गर्ने उद्देश्य राखेको छ।
समझदारी पत्रमा इरानको आणविक ऊर्जा सङ्गठन का प्रमुख मोहम्मद एस्लामी र रुसको राज्य आणविक ऊर्जा निगम रोसाटमका प्रमुख अलेक्सी लिखाचेभ बीच हस्ताक्षर भएको हो। एस्लामी सेप्टेम्बर २५ देखि २८ सम्म चल्ने विश्व आणविक सप्ताह फोरममा भाग लिन मस्को पुगेका थिए।
एमओयुमा भविष्यमाआधारित आणविक ऊर्जा संयन्त्रको डिजाइन र निर्माणका लागि थप सम्झौता तयार गर्ने योजना पनि उल्लेख छ।
एस्लामीले तेहरान–मस्कोबीचको सम्झौताको ढाँचाभित्र रुसले इरानमा आठ आणविक ऊर्जा संयन्त्र निर्माण गर्ने अपेक्षा राखिएको बताएका छन्, जसमा दक्षिणी प्रान्त बुशहरमा चार संयन्त्र समावेश छन्।
इरानले यस परियोजनामार्फत २० हजार मेगावाट बिजुली उत्पादन गर्ने महत्वाकांक्षी लक्ष्य लिएको छ। यो समझदारीले दुवै देशलाई राष्ट्रिय नियम र अन्तर्राष्ट्रिय दायित्वको पालना गर्दै आणविक ऊर्जामा सहकार्य गर्न प्रेरित गर्नेछ, जसले इरानको ऊर्जा संरचना सुदृढ गर्ने र रुससँगको प्राविधिक तथा रणनीतिक साझेदारीलाई थप मजबुत बनाउने अपेक्षा गरिएको छ।
