'अत्यधिक राजनीतिकरण' भएको भन्दै अमेरिकाले खाद्यसुरक्षा सर्वेक्षण गर्यो रद्द
हाम्रा कुरा
प्रकाशित २०८२ असोज ६ सोमबार
2.5k
Shares
काठमाडौं। अमेरिकाले वार्षिक रूपमा गर्दै आएको घरेलु खाद्य सुरक्षा सर्वेक्षण 'अत्यधिक राजनीतिकरण' भएको भन्दै रद्द गरेको छ। अमेरिकी कृषि मन्त्रालयले एएफपीलाई उपलब्ध गराएको विज्ञप्तिमा यो कार्यक्रम र आर्थिक रिपोर्टिङको समीक्षापछि भविष्यका रिपोर्टहरू बन्द गर्ने निर्णय गरिएको उल्लेख छ।
मन्त्रालयले सर्वेक्षणमा 'अत्यधिक राजनीतिकरण' भएको दाबी गर्दै यसलाई अनावश्यक ठहर गरेको छ। तीन दशक पुरानो यो सर्वेक्षण रद्द गर्ने कदम राष्ट्रपति डोनाल्ड ट्रम्प र कंग्रेसमा रहेका रिपब्लिकनहरूले खाद्य सहायता कार्यक्रममा प्रमुख सुधारहरू पारित गरेपछि आएको हो। स्वतन्त्र विश्लेषकहरूका अनुसार, यस निर्णयले लाखौं अमेरिकी नागरिकलाई उक्त कार्यक्रमबाट वञ्चित गर्न सक्छ।
मन्त्रालयको विज्ञप्तिमा तथ्यांक संकलन गर्ने प्रक्रियाको आलोचना गर्दै भनिएको छ, "तथ्यांक संकलन गर्न प्रयोग गरिएका प्रश्नहरू पूर्ण रूपमा व्यक्तिपरक छन् र यसले वास्तविक खाद्य सुरक्षाको सही तस्वीर प्रस्तुत गर्दैन।"
विज्ञप्तिमा ट्रम्प प्रशासनमा कम गरिबी दर, ज्याला वृद्धि र रोजगारी बढिरहेको अवस्थामा यो तथ्यांक गलत भएको दाबी गरिएको छ। सन् २०२३ को प्रतिवेदनले १३.५% अमेरिकी घरपरिवारले खाद्य असुरक्षाको सामना गरेको देखाएको थियो, जुन सन् २०१४ पछिकै सबैभन्दा उच्च स्तर थियो।
यस वर्षको आर्थिक तथ्यांकले सुस्त आर्थिक वृद्धि र कडा श्रम बजार देखाए पनि ट्रम्पले यी तथ्यांकलाई गलत भन्दै खारेज गरेका छन्। उनले श्रम मन्त्रालयको तथ्यांक विभागका प्रमुखलाई बर्खास्त गरी इजे एन्टोनीलाई नयाँ प्रमुखमा मनोनयन गरेका छन्।
मन्त्रालयको विज्ञप्तिमा यस वर्षको खाद्य असुरक्षा तथ्यांक राजनीतिकरण भएको आशंकाका कारण सन् २०२६ सम्म सार्वजनिक नगरिने पनि जनाइएको छ।
