काठमाडौँ। लेबनानी सशस्त्र समूह हिज्बुल्लाहका उपमहासचिव शेख नइम कासेमले लेबनानी सरकारले राखेको निःशस्त्रीकरणको मागलाई अस्वीकार गरेका छन्। उनले लेबनानको सार्वभौमसत्ता र रक्षाका लागि हिज्बुल्लाहका हतियारहरू आवश्यक रहेको बताएका छन्।
कासेमले हालै गरिएको निःशस्त्रीकरणको मागलाई "अवैध निर्णय" को संज्ञा दिँदै यो अमेरिकी र इजरायली आदेशअनुसार गरिएको बताए। उनले हिज्बुल्लाहलाई निःशस्त्र बनाउँदा इजरायलको मात्र हित हुने र हालका द्वन्द्वहरूमा ज्यान गुमाएका हजारौं लडाकु र नागरिकको बलिदानलाई धोका दिने उल्लेख गरे।
उनले २००६ देखि हिज्बुल्लाहले लेबनानी सेना र जनतासँग मिलेर इजरायललाई लेबनानी क्षेत्रमा अगाडि बढ्नबाट रोक्न महत्त्वपूर्ण भूमिका खेलेको दाबी गरे।
