पूर्वी युक्रेनमा रुसी सेनाले दुई गाउँ कब्जा गरेको दाबी
हाम्रा कुरा
प्रकाशित २०८२ साउन २९ बिहिबार
1.5k
Shares
काठमाडौँ । रुसी सेनाले पूर्वी युक्रेनको डोब्रोपिलिया नजिकका दुई गाउँहरू नियन्त्रणमा लिएको दाबी गरेको छ। रुसी रक्षा मन्त्रालयले सामाजिक सञ्जालमार्फत जारी गरेको विज्ञप्तिमा डोनेट्स्क क्षेत्रका सुवोरोभो र निकानोरीभका गाउँहरू 'मुक्त' गरिएको उल्लेख छ।
यी दुवै गाउँहरू डोब्रोपिलियाबाट करिब १५ किलोमिटरको दूरीमा रहेका छन्। डोब्रोपिलिया पुरानो कोइला खानी क्षेत्र हो र हालसम्म युक्रेनी सरकारको नियन्त्रणमा रहेको छ। रुसी सेनाले यस क्षेत्रमा तीव्र सैन्य दबाब सिर्जना गर्दै युक्रेनी सुरक्षाकर्मीहरूको रक्षा पंक्तिहरू भत्काउन सफल भएको बताइएको छ।
एएफपीले अमेरिकी 'इन्स्टिच्युट फर द स्टडी अफ वार (आइएसडब्लु)' को तथ्याङ्कको विश्लेषण गर्दै रुसले पछिल्लो एक वर्षयता गरेको यो सबैभन्दा ठूलो अग्रता भएको जनाएको छ। यो सैन्य प्रगति अमेरिकी राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिनबीच शुक्रबार हुने बैठकअघि भएको हो।
युक्रेनी अधिकारीहरूले यसअघि नै जुलाई महिनामा डोब्रोपिलियाबाट बालबालिका भएका परिवारलाई सुरक्षित स्थानमा सार्न आदेश दिएका थिए। करिब २८ हजार जनसंख्या भएको यो सहर अहिले रुसी ड्रोन र गोलाबारीको चपेटामा रहेको छ।
