काठमाडौँ । अमेरिकी राष्ट्रपति डोनाल्ड ट्रम्पले ब्राजिलमाथि भन्सार शुल्क बढाउने र प्रतिबन्ध लगाउने निर्णय गरेपछि ब्राजिलका विभिन्न शहरहरूमा विरोध प्रदर्शन शुरु भएका छन्। प्रदर्शनकारीहरूले 'संप्रभुता सम्झौताको विषय होइन' भन्ने नारासहित ब्राजिलमा रहेका अमेरिकी दूतावास र वाणिज्य दूतावासहरूअगाडि भेला भएर आफ्नो असन्तुष्टि व्यक्त गरेका छन्।
बुधबार, अमेरिकी सरकारले ब्राजिलबाट अमेरिका निर्यात हुने वस्तुहरूमा ५० प्रतिशतसम्म भन्सार शुल्क लगाउने घोषणा गरेको थियो। यसका साथै, पूर्वराष्ट्रपति बोल्सोनारोको मुद्दा हेरिरहेका सर्वोच्च अदालतका न्यायाधीश अलेक्जेन्द्र डि मोराइसमाथि पनि प्रतिबन्ध लगाइएको छ। प्रदर्शनकारीहरूले यो कदमलाई ब्राजिलको न्यायिक स्वतन्त्रता र राष्ट्रिय स्वाधीनतामाथिको हस्तक्षेप भएको आरोप लगाएका छन्।
ब्राजिलका राष्ट्रपति लुइज इनासियो लुला दा सिल्भाले अमेरिकी नीतिको कडा विरोध गरेका छन्। उनले यसलाई ब्राजिलको आन्तरिक मामिलामा अनावश्यक हस्तक्षेप भएको भन्दै आफ्नो देशको निर्णय प्रक्रिया पूर्ण रूपमा स्वाधीन र संवैधानिक रहेको बताएका छन्। राष्ट्रपति लुलाले भने, "ब्राजिल कुनै पनि प्रकारको बाह्य दबाब वा प्रभावमा चल्न सक्दैन। हामीले समानताको आधारमा अन्तर्राष्ट्रिय सम्बन्ध अगाडि बढाउनु आवश्यक छ।"
