काठमाडौँ। युक्रेनका विभिन्न क्षेत्रहरूमा रुसले गरेको भीषण हवाई आक्रमणमा कम्तीमा २५ जनाको ज्यान गएको छ, जसमा २३ वर्षीया गर्भवती महिला र १६ जना कैदीसमेत परेका छन्। यी आक्रमणहरू अमेरिकी राष्ट्रपति डोनाल्ड ट्रम्पले रुसलाई युद्ध अन्त्य गर्न नयाँ समयसीमा तोकेपछि सुरु भएका थिए, जसमा तोकिएको समयभित्र आक्रमण नरोकिए कडा आर्थिक प्रतिबन्ध लगाइने चेतावनी दिइएको थियो। आक्रमणको केही घण्टापछि भने रुसले शान्ति प्रक्रियाप्रतिको प्रतिबद्धता जनाएको छ।

युक्रेनी राष्ट्रपति भोलोडिमिर जेलेन्स्कीले दक्षिणी जापोरिझिया क्षेत्रको एक कैदीगृहमा जानाजान आक्रमण गरिएको आरोप लगाएका छन्। सो आक्रमणमा १६ कैदीको ज्यान गएको र ४० भन्दा बढी घाइते भएको बताइएको छ। राष्ट्रपति जेलेन्स्कीले सामाजिक सञ्जालमा लेख्दै भनेका छन्, "यो योजनाबद्ध हमला हो, दुर्घटनावश होइन। रुसले त्यहाँ सर्वसाधारण कैदी रहेको कुरा थाहा नपाउने कुरा सम्भव छैन।" यद्यपि, रुसी प्रवक्ता दिमित्री पेस्कोभले यस्ता आरोप अस्वीकार गर्दै रुसी सेनाले कहिल्यै सर्वसाधारणलाई लक्षित नगर्ने बताएका छन्।

युक्रेनी वायुसेनाका अनुसार, रुसले ३७ ड्रोन र दुई मिसाइल प्रक्षेपण गरेको थियो, जसमध्ये ३२ ड्रोन खसालिएका छन्। यद्यपि, डनिप्रो क्षेत्रमा रहेको क्याम्यान्स्के सहरको एक अस्पतालमाथिको आक्रमणमा २३ वर्षीया गर्भवती महिला डायना सहित तीन जनाको मृत्यु भएको राष्ट्रपति जेलेन्स्कीले जानकारी दिएका छन्। यसैगरी, खार्किभ क्षेत्रमा गरिएका छुट्टाछुट्टै हमलामा ६ जनाको मृत्यु भएको छ।

युक्रेनी मानवअधिकार आयुक्त द्मित्रो लुबिनेत्सले जेलमाथिको आक्रमणलाई 'युद्ध अपराध' को संज्ञा दिएका छन्। उनले सामाजिक सञ्जालमा "कैदीले पनि जीवन र सुरक्षाको अधिकार गुमाउँदैनन्" भन्दै यस कार्यको निन्दा गरेका छन्।

रुस–युक्रेन युद्ध चौथो वर्षमा प्रवेश गरिरहँदा, रुसी सेनाले नयाँ गाउँहरू कब्जामा लिएको दाबी गरेको छ। युक्रेनले यथासम्भव आक्रमण रोक्ने प्रयास गरिरहेको भए पनि, रुसी फौज केही नयाँ क्षेत्रमा समेत अघि बढेको देखिएको छ।