ट्रम्पको भन्सार शुल्क घोषणाले टोकियो सेयर बजारमा गिरावट
हाम्रा कुरा
प्रकाशित २०८२ असार २४ मंगलबार
1.4k
Shares
टोकियो। अमेरिकाका राष्ट्रपति डोनाल्ड ट्रम्पले केही देशहरूलाई नयाँ एकपक्षीय भन्सार शुल्क लगाउने बताएका कारण लगानीकर्ताहरू सतर्क रहँदा सोमबार टोकियोको सेयर बजार ओरालो लागेको छ।
जापानको मुख्य सेयर सूचकांक निकेई २२५ सोमबार २२३.२० अङ्कले घटेर ३९,५८७.६८ मा बन्द भएको छ। यो अघिल्लो शुक्रबारको तुलनामा करिब ०.५६ प्रतिशतको गिरावट हो।
त्यस्तै, अर्को महत्त्वपूर्ण सूचक ’टोपिक्स’ पनि १६.२३ अङ्कले घटेर २,८११.७२ मा पुगेको छ, जुन ०.५७ प्रतिशतको गिरावट हो।
बजारमा लगानीकर्ताहरूले सक्रिय रूपमा कारोबार गर्न नचाहेको देखिएको छ, किनभने ट्रम्पले पठाउने भनिएको भन्सार शुल्कको पत्र जापानलाई पनि लागू हुन्छ कि हुँदैन भन्ने विषयमा अनिश्चितता रहेको छ। अहिले चलिरहेको आपसी भन्सार सहमतिको अवधि जुलाई ९ मा सकिँदैछ, जसले थप अन्योलता सिर्जना गरेको छ।
राष्ट्रपति ट्रम्पले शुक्रबार झन्डै १२ देशलाई पठाइने पत्रहरूमा अमेरिका आयात हुने वस्तुहरूमा लाग्ने नयाँ भन्सार शुल्क उल्लेख गरिएको जानकारी दिएका थिए।
